Giatake sa mga pulis ang Eskwelahang Bakwit, ang temporaryong eskwelahan sa mga Lumad sulod sa kampus sa University of San Carlos sa Talamban, Cebu City niadtong Pebrero 15. Nagpasangtwaryo dinhi ang mga Lumad ug ilang mga magtutudlo dihang wala sila makauli sa Mindanao human gipahamtang ang lockdown niadtong Marso 2020. Giila sila isip mga bisita sa unibersidad.

Sa nakuhang bidyo sa reyd, makita nga nagsinggita ug nanghilaka ang mga batang Lumad samtang pugos silang ginakuyog sa mga pulis. Baynte says kanila ang giaresto ug gipreso, lakip ang 19 ka menor de edad. Usa sa mga gidakop si Chad Booc, magtutudlong boluntir nga usa sa mga nagpetisyon sa Korte Suprema aron ibasura ang Anti-Terror Law.

Kakunsabo ang militar, grupong paramilitar nga Alamara ug mga lokal nga upisyal sa Talaingod, ginapagawas sa pulis nga “operasyong reskyu” ang reyd. Gikasuhan nila og kidnapping ug iligal nga detensyon si Booc ug ang lain pang unum ka hamtong.

Gisugat og mga pagmakmak ang iligal nga reyd ug pag-aresto. Nagprotesta gilayon sa Commission on Human Rights (CHR) ang mga estudyante sa Eskwelahang Bakwit nga anaa sulod sa University of the Philippines sa Diliman, Quezon City ug ilang mga tigsuporta. Gipanghimakak mismo sa CHR ang pasangil sa pulis nga “gipugos” ang mga batang Lumad nga magpabilin sa eskwelahan.

Nagsumite ang blokeng Makabayan og resolusyon aron imbestigahan ang insidente sa Kongreso. Sa Korte Suprema, gimando sa mga mahistrado nga ilakip ang kaso ni Booc sa ipasaka nga petisyon aron temporaryong ihunong ang Anti-Terror Law.

Nagsaad usab ang Partido Komunista ng Pilipinas nga papanubagon ang mga nangdaugdaug sa mga Lumad. Gikundena niini ang NTF-ELCAC nga walay dudang may pakana sa insidente.