Sa ikatulong higayon karong tuiga, subling misaka ang presyo sa mga produktong petrolyo niadtong Pebrero 14. Misaka og ₱0.75 ang kada litro sa gasolina, ₱1.25 sa diesel ug ₱1.10 sa kerosene. Niadtong Pebrero 9, misaka na og ₱0.85 ang gasolina, ₱1.10 ang diesel ug ₱1.00 ang kerosene.

Kumpara sa milabayng tuig, mas misaka na og ₱4 kada litro ang gasolina, ₱3.90 ang diesel ug ₱3.35 ang kerosene. Luyo kini sa padayon nga pagkunhod sa presyo sa krudong lana sa pangkalibutang merkado panahon sa pandemya.

Gihatag nga hinungdan sa Department of Energy ang padayon nga pagkunhod sa produksyon sa mga nasud sa Organization of the Petroleum Exporting Countries o OPEC aron artipisyal nga ipataas ang presyo sa krudong lana. Sulod sa usa ka tuig, pinakataas ang presyo sa krudong lana niadtong Pebrero 5.

Wala kaayo nabati sa Pilipinas ang pag-ubos sa pangkalibutang presyo tungod sa pagpahamtang sa rehimeng Duterte sa dugang nga 10% buhis sa ginaimport nga krudo ug produktong petrolyo niadtong Mayo 2020 sa katumanan sa Executive Order 113. Tumong niining maghakop og ₱6.8-bilyong rebenyu nga pagagamiton kuno isip ayuda sa panahon sa pandemya.

Apan matud mismo sa Department of Energy sa maong panahon, ipasaka sa dugang buhis ang presyo sa gasolina og ₱0.60 ug sa diesel og ₱0.84 kada litro.

Buut ipasabot, kabahin sa ayudang gipanghinambog ni Duterte ang naggikan usab sa bulsa sa katawhan sa dagway sa mas taas nga singil sa transportasyon, pagkaon ug pangpublikong yutilidad.

Una na nga gipahamtangan og buhis ang krudong lana ilalum sa balaod nga TRAIN. Gipasaka sa maong balaod ang presyo sa gasolina, kerosene, LPG ug uban pa og ₱1 kada litro ug ₱1.50 kada litro sa diesel.