“Huli week” iti semana santa

,

Uppat a lider-masa ken aktibista iti Central Luzon (CL), ken maysa pay iti Cagayan Valley a biktima ti red-tagging ti tiniliw ken pinilaan kadagiti parbo a kaso idi semana santa. Tallo ti natiliw iti CL idi Marso 30.

Natiliw ni Joseph Canlas, mangidadaulo ti Alyansa ng mga Magbubukid sa Gitnang Luzon, iti Mexico, Pampanga. Aktibo isuna kadagiti kampanya kontra iti pananggamgam ken kumbersyon ti taltalon iti rehiyon.

Natiliw met ni Florente Viuya, Sr., lider-mangmangged ken dadaulo ti Bayan-CL iti Bamban, Tarlac. Kadua na a natiliw ti paralegal ti Karapatan-CL a ni May Arcilla.

Iti Bulacan, ni Concepcion Opalla, dati a lider ti Kadamay a nangidaulo iti okupasyon ti Pandi idi 2017 ket natiliw idi Marso 26. Dua nga aldaw sakbay nga inruar dagiti pulis isuna.

Iti Southern Tagalog, natiliw ni Genelyn Dichoso, opisyal ti Karapatan ken ti anak na a ni Jennifer iti Calauag, Quezon idi Abril 5. Idi Marso 30, rinaut dagiti pulis ti opisina ti Alyansa ng Manggagawa sa Engklabo iti Santa Rosa, Laguna ken namulaan kadagiti paltog ken pasabog.

Iti Manalo, Amulung, Cagayan, natiliw ni Calixto Cabildo, dadaulo ti Anakpawis-Cagayan idi Marso 24.
Kabayatanna, saan a nainkalintegan a naisina kenni Elizabeth Estilon, balud pulitikal iti Sorsogon, ti anak na a maladaga a ni Prince Joel idi Marso 27.

"Huli week" iti semana santa