Ayuda militar sang US, ayuda sa tiraniya sang rehimeng Duterte
Indi na nangin makakilibot ang gin-anunsyo sini lang sang mga upisyal sang rehimeng Duterte nga indi na pagpadayunon ang nauna sini nga gindeklarar nga plano nga ibasura ang Visiting Forces Agreement (VFA). Klaro na gid man sa umpisa nga ang katuyuan lang sang “pamahug” nga ibasura ini amo para lang magpangayo sang dugang nga ayuda militar para sa iya tiraniya.
Sa bibig man mismo ni Duterte naghalin ang mga tinaga nga “kon gusto ninyo ang VFA, dapat magbayad kamo.” Sandig man ini sa iya prinsipyo nga “pera-pera lang ina” nga nagaubay sa iya polisiya sa luwas sang pungsod. Para kay Duterte, ang halambalanon sang pungsodnon nga independensya kag kahilwayan mahimo takson kon pila sa kwarta. Pareho sang ginbaligya ni Aguinaldo sa US ang bilog nga Pilipinas sa kantidad nga $20 milyon, gin-atras ni Duterte ang pagbasura sa VFA kag ginpahanugutan ang paghiwat sang pinakadaku nga ehersisyo militar (Balikatan) sang US pagkatapos promisahan nga baligyaan sang $2.4 bilyong balor sang mga kagamitan militar.
Masobra isa ka tuig man ang kadugayon sang pakignegosasyon nga naabtan na sang pandemya kag sang pagbaylo sang gubyerno sa US. Sa katapusan, ginhatag man sang gubyernong Biden ang dugang nga ayuda militar sa rehimeng Duterte bisan pa may mabaskog nga panawagan ang pila ka senador kag kongresista sa US, subong man sang mga demokratikong pwersa sa Pilipinas kag mga asosasyon nga Fil-Am sa US, nga isuspendir ini bangud sa lapnagon nga mga kaso sang mga pagpatay kag mga paglapas sang mga pulis kag suldado sa tawhanon nga kinamatarung.
Ang matuod, ang paghatag sang ayuda militar pabor man sa imperyalismong US bangud pabaskugon sini ang Armed Forces of the Philippines (AFP) kag ang gera konra-insurhensya nga gindisenyo man sang US. Sa kamatuoran, ini gera nga ginalunsar sang US paagi sa AFP agud pangapinan ang interes sang US sa ekonomya kag heyopulitika. Ang AFP ang pangunahon nga haligi sang gahum sang US sa Pilipinas. Sa nagligad nga pila ka dekada, ginahanas, ginahatagan adbays, ginaarmasan kag ginapondohan sang US ang AFP. Ginahimo ini paagi sa mga kasugtanan militar pareho sang 70-tuig nga Mutual Defense Treaty kag Visiting Forces Agreement sang 1998.
Ginhatag sang US ang luyag ni Duterte nga ayuda militar, bisan pa ang kahulugan sini amo ang pagsuporta sa rehimen nga naghatag-dalan sa pagpabaskog sa presensya militar sa West Philippine Sea sang China, hugot nga imperyalistang karibal sang US sa ekonomya kag hegemonya.
Bilang pinuno sang neokolonyal nga estado, sunud-sunuran si Duterte sa mga polisiya nga dikta sang US, ilabi na sa pagpasulong sa mga polisiya nga neoliberal sa ekonmya, kontra-insurhensya kag “kontra-terorismo”. Pero, nagaluhud-luhod man si Duterte sa China kag ginbaylo ang eksklusibo nga kinamatarung sang Pilipinas sa kadagatan sini kabaylo sang promisa nga pila ka pulo ka bilyong dolyar nga pautang, subong man sang pagkontrol sa baligyaanay sang iligal nga droga halin sa China.
Wala nagustuhan sang imperyalismong US ang pamamangka ni Duterte sa duha ka suba. Ilabi na sa atubang sang nagaigting nga banggianay sang US kag China sa ekonomya kag baligyaanay, indi paborable sa US nga nakighampang sa iya karibal ang papet niya sa Pilipinas. Paagi sa paghatag sang dugang nga ayuda militar kabaylo sang pagpadaku sang presensya militar sini sa Pilipinas kag mga kadagatan sa palibot sini, ginatantya sang US nga magahumok si Duterte sa iya postura nga maki-China.
Luyag man sang US nga labing mapahugot ang kontrol sini sa papet nga rehimeng Duterte ilabi na nga may posibilidad nga makapabilin ang pasistang guban sa poder lampas sa 2022. Sa sini, labing nangin klaro ang papel sang imperyalismong US sa likod sang tiraniko kag teroristang pagginahum ni Duterte, kag nahayag ang pagka-paltik sa mga ginapabugal sini nga tagasakdag sang tawhanon nga kinamatarung. Sa paghatag sang dugang nga ayuda militar kay Duterte, labi nga ginasuportahan sang US ang tiraniya kag maduguon nga paghari sang teroristang rehimen.
Pero samtang padayon nga ginasuportahan sang imperyalismong US si Duterte, padayon man ini nga nagapabaskog sang angut kag suporta sa iban nga hubon sang nagaharing sahi nga anti-Duterte nga lunsay maki-US agud permi ini nga may reserbang baraha sa tion nga maghuyang ang nagahari nga tiraniya. Pareho ini sadtong dekada 1980 sang dungan nga ginsuportahan sang US si Marcos kag ang sadto mga hubon anti-Marcos tubtob atrason sini ang suporta kay Marcos sa atubang sang malaparan kag sustenido nga protesta sang banwa batuk sa diktadurya.
Ang kinalain sa sitwasyon subong amo nga aktibo man ang pagpasilabot kag paghangkat sang China sa daan nga eksklusibong patag sang dominasyon sang imperyalismong US sa reaksyunaryong pulitiko, pareho sang nagaharing hubon Duterte, labi nga nagadaku ang ginapangayo nga bayad sa ila nga pagpakatuta, samtang ginasurender ang kahilwayan sang pungsod. Sa palaabuton nga eleksyon 2022, pinakaposible nga makita ang tunay nga presyo kag katampad ni Duterte kag ang wala pa nakita nga lebel sang dumuluong nga pagpasilabot.
Daw tuko nga nagakapyot si Duterte sa poder sa sobra nga kahadlok nga mapasabat sa iya mga krimen sa katawhan kag mga krimen sa gera. Lubos kabangis niya nga ginatapna kag ginapiang ang tanan nga mga pwersa nga nagapamatuk sa iya tiraniya kag sa iya iskema nga magpabilin sa poder lampas sa 2022. Para ipakita sa imperyalismong US nga dapat padayon siya nga suportahan, todo-larga subong ang rehimeng Duterte sa pagsulong sang “gera kontra-terorismo”. Sa tabon sini, ginahimo ang ginapaigting pa nga kampanya sang pagpamatay kag pagpamigos batuk sa mga pwersang patriyotiko kag demokratiko, gamit ang mga armas kag ayuda militar halin sa US.
Dapat labi nga maghimakas kag manindugan ang pumuluyong Pilipino batuk sa pagpakatuta sang rehimeng Duterte sa imperyalismong US kag sa paghatag-dalan sini sa labi nga pagpadaku sang presensya militar sang US sa Pilipinas bilang kabahin sang pagpakigbanggi sini sa China. Dapat labi nga pabaskugon sang pumuluyong Pilipino ang pagbuyagyag sa pasista nga mga krimen ni Duterte kag sukton ang gubyernong Biden sa pagsuporta sa iya nga tiraniya kag terorismo.
Dapat isahon ang tanan nga pwersang demokratiko kag nagapamatuk sa tiraniya ni Duterte, tukuron ang pinakamalapad nga paghiliusa sang pumuluyong Pilipino, kag paslawon ang malaut nga padihot nga magpabilin sa poder.
