Ngaa mapaslawan ang AFP nga lutuson ang BHB sa NCMR?
Tuman kadaku nga kabutigan ang ginpabugal ni Sec. Martin Andanar sang Presidential Communications Operations Office sang Hulyo 28 nga pabagsak na ang rebolusyonaryong hublag sa North Central Mindanao Region (NCMR). Ini kuno bangud may 2,517 myembro sang Bagong Hukbong Bayan (BHB) nga nagsurender, 618 Pulang hangaway nga “nanyutralisa” kag 10 prenteng gerilya na ang nabungkag sa 2020 lang. May ara kuno dugang nga 77 barangay nga “nalimpyo na” kag sa sini makabaton sang pondo halin sa maanomalya nga Barangay Development Program. Si Andanar ang gintalana nga koordineytor sang National Task Force to End Local Communist Armed Conflict para sa Region 10.
Ang matuod, wala sang nabungkag nga prenteng gerilya o sentro sa NCMR sa 2020. May mga erya nga temporaryo nga ginbayaan pero nagapabilin nga nakapwesto ang mga yunit sang BHB sa estratehikong mga lugar sang rehiyon. May ara man nga mga Pulang hangaway nga nagsurender pero pila lang sila kag masami bunga sang presyur sang kaaway sa ila mga pamilya.
Halin Marso 2020 tubtob Marso 2021, nakalunsar ang hangaway sang banwa sa rehiyon sang 102 taktikal nga opensiba kon sa diin 94 ka mga suldado ang napatay kag 84 ang napilasan. Samtang, 18 Pulang hangaway ang napatay sa mga inaway kag iban pang kabangdanan.
Sa tunga sang mainit nga inaway, nakalunsar ang mga yunit diri sang mga kampanyang agraryo para pataason ang suhol sang mga mamumugon sa uma kag presyo sang mga produktong agrikultural. Pokus nga rehiyon
Halin pa Marso 2018 ginhimo sang Armed Forces of the Philippines (AFP) nga pokus nga rehiyon ang NCMR. Pagkatapos ang duha ka tuig nga napaslawan nga lutuson ang BHB diri, naghimo sang reorganisasyon ang 4th ID kag 1st ID sang 2020 para i-pokus ang lima ka brigada (tatlo ka lubos kag pila ka bahin sang duha) sa ginapatihan sini nga mga subrehiyon.
Isa tubtob duha ka batalyon ang gindeploy sang AFP sa kada prenteng gerilya. Ginakinaiyahan ang mga operasyon nga ini sang okupasyon militar sa kuno “malimpyuhan” nga baryo kumbinasyon ang pagplastar sang mga detatsment para sudlon kag palibutan ang ginatantya sini mga “balwarte” sang hangaway sang banwa. (Sa katapusan sang 2020, nagadamo sa 169 ang mga detatsment sang CAFGU kag 19 regular nga kampo militar.)
Gindunganan ini sang nakapokus kag sustenidong mga operasyong kombat nga nagagamit sang libo ka tropa kag suportado sang mga eroplano kag helikopter panggera, drone, mortar kag kanyon. Indi magnubo sa 23 insidente sang pagpamomba halin sa kahanginan gamit ang FA-50 fighter jet kag helikopter halin Disyembre 2018 tubtob Agosto 2020. Sa 2020, nagsampaw ang pandemya nga Covid-19 nga gingamit sang AFP para labing maglabugay sa kaumhan kag kontrolon ang hulag sang populasyon.
Pag-atubang sa ginpasingki nga pag-atake
Sa pangkabilugan, nagamit sang mga yunit diri ang taktikang gerilya sang pagsaylo-saylo kag pagka-pleksible nga mahulag para uyatan ang inisyatiba sa gera kag imentenar ang pleksibilidad sang mga yunit.
Sige-sige nga nagtinguha ang mga pwersa diri nga pataason ang ikasarang pulitiko-militar sang mga kumander kag hangaway indi para sagngon ang mga atake sang kaaway, kundi para pataason ang lebel sang inaway banwa. Gintasar kag ginkuhaan sang mga leksyon ang mga daku nga inaway, amo man ang mga atake kag kontra-atake sa tunga sang mga yunit sini kag sang AFP.
Sa tunga sang ginpasingki nga mga atake, labi nga nagdulot sa isip sang BHB ang kakinahanglanon sang nagapalapad kag nagaikit nga pagpakig-away gerilya sa mas masangkad nga erya. Yabi diri ang pagpalig-on kag pagpalapad sang mga base kag sonang gerilya. Angut sini, kinahanglan nga magpakasampaton ang mga kumander kag mga upisyal sang hangaway sang banwa sa sistematiko nga paglunsar sang rebolusyong agraryo kag iban pang kampanya para organisahon kag pahulagon ang masa kag lubaron ang ila kinahanglanon kag kaayuhan. Labi ini nga nangin importante sa pagpanghalit sang pandemya nga Covid-19 kag katalagman sini sa kaumhan kon sa diin gamay, kon may ara man, sang mga imprastruktura sa ikaayong lawas.
Nahibal-an man sang hangaway sang banwa ang kakinahanglanon sang gilayon nga atubangon ang taktika nga gradual constriction kag pagreyd sang kaaway paagi sa pagsalakay sa mga detatsment sini kag paglunsar sang mga koordinado nga opensiba sa lebel prente kag subrehiyon. Ini para paslawon ang disenyo sang kaaway nga dingutan ang mga hangaway sang suportang masa kag tabugon sila sa malayo nga lugar sa katalunan kon sa diin mapilitan ang mga yunit sang BHB nga makig-away sa puro militar nga paagi. Subong man, talalupangdon sa mga baryo nga may mga detatsment ang kadamo kag brutalidad sang mga pagpang-abuso militar sa pumuluyo.
Angut sini, ginmanduan sang mga komite sang Partido ang hangaway nga hugot nga uyatan ang basehang oryentasyon sang mga platun kag pahulagon ang mga ini sa gintalana nga sakop nga punsok sang mga baryo. Kadungan sini, kinahanglan hugot nga ubayan sang mga yunit sang Partido ang armadong pagbato sang masa kag mangin katuwang sila kag mga yunit sang milisyang bayan sa pagsakdag sa regular nga mga pwersa kag sa paglunsar sang mga taktikal nga opensiba. Nagasalig ang mga kaupod diri nga indi mapyerde sang AFP ang BHB kag rebolusyonaryong hublag sa rehiyon sa nabilin nga tuig ni Duterte. Puhunan sini ang mga leksyon nga nakuha sa pila ka dekada na nga rebolusyonaryo nga pagpakig-away kag halin sa mainit nga pagpakigbato sa kaaway, labi na sa nagligad nga tatlo ka tuig. Ang inagihan nga ini ang nagbun-ag sang mga kadre, kumander kag tinawo nga may kalig-on sa ideolohiya, nagakaigo nga kahanasan militar, kahandaan sa sakripisyo kag kabudlay, kag wala nagakalingkang nga diwa nga mapang-away.
