Gitaho sa Kilusang Magbubukid ng Pilipinas (KMP) niadtong Agosto 12 nga misaka ang presyo sa abono og ₱200-₱400/bag sa milabayng duha ka bulan. Sa datos sa Department of Agriculture (DA), ang presyo sa prilled urea mikabat ₱1,415.99 kada bag, ₱1,393.32 sa granular urea, ₱778.79 sa ammosul ug ₱1,268.19 sa complete. Halos doble kini kung ikumpara sa presyo niadtong milabayng tuig.

Ginagamitan og abono ang halos 85% sa mga humayan ug katunga sa mga gulayan sa nasud. Duso sa mga mag-uuma nga angayang imbestigahan sa DA ang pagsaka sa mga presyo ug rendahan ang pagpang-import sa imported ug mahal nga abono. Kadungan sa pagsaka sa presyo sa abono, misaka usab ang presyo sa petrolyo ug mga pestisidyo.