Pangkugmat sa mga sibilyan, taktika sang terorista nga estado
Narekord sining paskwa ang lapnagon nga mga atake sang Armed Forces of the Philippines sa mga sibilyan nga komunidad sa tuyo nga punggan kuno ang mga pagtilipon para sa ika-53 anibersaryo sang Partido Komunista sang Pilipinas (PKP).
Ginsulong sang mga suldado sang 75th IB ang kasal sang Lumad sa Sityo Katabadan, Barangay San Roque, San Miguel, Surigao del Sur sang Disyembre 24 kag ginpalukpan ang masobra 30 residente nga nagtambong. Napatay sa pagpangluthang ang negosyante nga si Vilma Tawede, samtang apat pa ang napilasan. Ginpagwa sang militar nga myembro sang Bagong Hukbong Bayan (BHB) si Tawede.
Sa Sta. Teresita, Cagayan, ginreport sang Enero 4 nga ginsunog sang mga suldado sang 98th IB ang tatlo ka kalapaw (payag sa uma) sang mga mangunguma sa Sityo Bungcag, Barangay Luga. Pagkatapos ang krimen ginpalapta sang militar nga BHB kuno ang naghimo sang pagpanunog.
Sa Northern Samar sang Disyembre 26, 2021, ala-1 sang kaagahon, apat ka beses nga ginkanyon sang 8th ID ang mga ulumhan sa dulunan sang mga barangay sang San Miguel sa Las Navas, kag Osang kag Hinagonoyan sa Catubig. Sang hapon man nga ina, pilit nga gintipon sang 20th IB ang mga residente sang Barangay San Miguel, ginpauyat sang mga anti-BHB nga mga plakard kag ginkuhaan sang retrato para pagwaon nga boluntad sila nga nagtambong sa rali kontra-PKP/BHB/NDF.
Ginkanyon sang 9th ID ang palibot sang Sityo Campo Nueve, Barangay Del Carmen sa Lagonoy, Camarines Sur sang Disyembre 28 kag 29, 2021. Bilog nga gab-i ang pagpanganyon kag indi magnubo sa napulo ka bomba ang ginbuy-an sang militar. Bangud sini, napilitan nga bayaan sang may 100 residente ang ila nga balay kag magsangtwaryo sa gamay nga kapilya sang barangay. Ginhimo ang atake pagkatapos sang napaslawan nga pagsalakay sang 83rd IB sa yunit sang BHB nga ginkamatay sang isa ka suldado kag pagkararong sang duha pa.
