Pugante nga umeskapo ha pagtortyur han kapulisan ha Samar, ginpagawas nga “hitaas nga lider han NPA”

Read in: English

Usa nga pugante nga umeskapo ha pangabuso han Philippine National Police (PNP) an ginpapagawas yana komo usa nga lider han New People’s Army (NPA) ha Samar, sigon ha report han NPA-Eastern Visayas.

Nagsering an PNP nga gin-aresto hini hi Rowel Mabahin, 21, ha Sampaloc, Manila hadton Hunyo 18 kahuman niya umeskapo ha hedkwarters han kapulisan ha bungto han Calbiga masobra duha katuig na an naglabay. Gin-aalegar nira nga hi Mabahin platun lider han NPA ha Eastern Samar nga kaapi liwat han special operations group o SOG.

Ginpanhimuwa ini han Efren Martires Command han NPA-EV, subay ha nahiuna nga report tikang ha lokal nga yunit han NPA nga nagsering nga diri lider han NPA hi Mabahin kundi usa nga pugante nga umeskapo ha kapulisan upod han iya menor de edad nga bugto kahuman nira matotyur ngan maabuso. Gin-akusahan an duha han pan-ngawat ngan pangastigo.

Ha ira 2019 nga report, ginsering han Arnulfo Ortiz Command han NPA-Western Samar nga usa nga SPO1 Eduardo T. Burca an nagtarhug nga papatayon hira kahuman magpakita han bidyo han ambus han NPA ha bungto han Motiong ha pareho nga prubinsya. Antes hini, gintortyur han Caliga PNP an manghod nga Mabahin pinaagi han pagpatulon ha iya han tubig nga mayda harang. Tungod hini, nahadlok an magbugto ha panarhug han nasering nga pulis.

Kahuman gumikan ha istasyon han pulis, boluntaryo nga sumurender an magbugto ha NPA. Dara nira na pira nga higtaas nga kalibre han pusil ngan gatus-gatos nga bala. Sigon ha NPA-EV, naduso an magbugto nga maghimo han krimen tungod ha kakurian, kagutom ngan kawaray hin maupay nga kabubwason. Kundi nagpahayag hira han kaandaman nga atubangon an rebolusyunaryo nga sistema han hustisya tungod kay maaram hira nga hahatagan hira han higayon nga magbag-o han kinabuhi, sukwahi ha ira naeksperyensya ha kamot han PNP.

Ginkundenar han NPA-EV an PNP ha butad nga paghimu-himo hini han estorya agud pakaratuon an rebolusyunaryo nga kagiusan.#

Pugante nga umeskapo ha pagtortyur han kapulisan ha Samar, ginpagawas nga "hitaas nga lider han NPA"