Hingpit nang nakabalik sa gahum ang mga Marcos dihang iproklama si Ferdinand Marcos Jr. isip ika-17 nga presidente sa reaksyunaryong gubyerno sa Republika sa Pilipinas niadtong Mayo 25. Dungan niini, napalungtad usab sa mga Duterte ang ilang paghari sa pagdaug ni Sara Duterte isip bise presidente.

Daw gipagawal sa mga Marcos sa katawhan ang ilang pagbawi sa poder dihang misaka sa entablado atubangan sa giusang sesyon sa Kongreso ang tibuok pamilya, sa pagpanguna sa inahang si Imelda, nga angayan untang nabalhog sa prisohan.

Mipakpak sa maong “makasaysayanong” higayon ang kadaghanan sa mga myembro sa Kongresong gidagsang sa mga dinastiya sa pulitika. Ang blokeng Makabayan lang ang nagpadayag og grabeng kasilag sa pinaagi sa pagsinggit sa ilang pagbabag ug paggawas sa balay-tigumanan atol sa proklamasyon.
Gibweltahan sa Partido Komunista ng Pilipinas ang pagsaulog sa mga Marcos isip usa ka “dakung insulto sa kolektibong kasinatian sa katawhang Pilipino” nga nag-alsa ug nagpalayas kanila. Sa gawas sa Kongreso, gitukmod sa eksena ang kasuko sa daghang tawo ug mikaylap ang panawagang prisohon si Imelda nga gihukmang sad-an sa 77 ka tuig nga pagkapriso sa pito ka kaso sa graft (pagpanghukhuk) niadto pang Nobyembre 2018.


Gubyerno sa mga tirano
ug teknokrata

Sama sa gidahum, gigantihan ni Marcos Jr. ang iyang mga ginsakpan ug alyado og mga pusisyon sa iyang gabinete. Lakip dinhi ang mga clan o kaliwat nga nakinabang sa diktadurya sa iyang amahan.

Aron siguruhong padayon ang daloy sa dis-impormasyon ug kontrolon ang ilang naratibo, gituboy niya isip Executive Secretary si Victor Rodriquez, ang dugay na niyang chief of staff ug tigpamaba sa panahon sa kampanya. Gihimo usab niyang Press Secretary si Rose Beatrice Cruz-Angeles, usa ka “vlogger” nga nagpadagan sa mga troll farm, nga gigamit sa kampanya sa pagtuis sa kasaysayan.

Mobarog isip kalihim sa Department of Education si Sara Duterte samtang ang iyang tigpamaba nga si Christina Garcia-Frasco gibutang sa Department of Tourism. Mobarog isip kalihim sa Department of Social Welfare and Development ang brodkaster nga si Erwin Tulfo (igsuon sa napili nga senador nga si Raffy Tulfo ug sa kanhing Tourism Secretary nga si Wanda Tulfo-Teo). Gituboy nga Special Assistant to the President si kanhing Davao del Norte Rep. Anton Lagdameo Jr. Si Rodrigo Duterte mismo gihugonhugon nga itudlo isip “drug czar,” nga sukwahi sa tanang mga kasong iyang pagaatubangon kalabot sa peke nga gyera kontra-droga.

Wala gitandog ug labaw pang gipalig-on sa mga teknokratang tigpatuman sa neoliberalismo ang iyang “tim sa ekonomiya.” Gilangkuban kini nilang Benjamin Diokno isip kalihim sa Department of Finance, Felipe Medalla isip gubernador sa Bangko Sentral ng Pilipinas, Alfredo Pascual sa Department of Trade and Industry, ug si Arsenio Balisacan sa National Economic and Development Authority.

Gibutang usab niyang kalihim sa Department of Justice si Jesus Crispin Remulla, anak sa kanhing gubernador nga si Juanito Remulla Sr. nga isa sa pinakalunod-patay nga alipures ni Marcos Sr. Nakaangkon ang maong Remulla og batikos niadtong panahon sa kampanya human iyang gi-red-tag ang mga misalmot sa rali sa Leni-Kiko tandem sa Cavite.

Anak usab sa usa ka kanhing alipures ang gituboy ni Marcos Jr. sa Department of Migrant Workers. Giplastar sa pusisyon si Susan Ople, anak sa kanhing Minister of Labor na si Blas Ople, ang nag-unang propagandista sa “Bagong Lipunan”. Tsirperson usab sa Presidential Management Staff si kanhing Manila Rep. Zenaida Angping, usa pa ka loyalista.

Samtang pugos nga gibungkag sa mga pulis ang martsa sa mga progresibong grupo gikan sa Commission on Human Rights (CHR) ngadto sa Kongreso sa adlaw sa proklamasyon.
Gibomba nila og tubig ug gibatuta ang mga raliyista nga nagresulta sa pagkasamad sa 14 katawo. Gabii pa lang sa Mayo 24, nagpaabot na ang mga pulis sa lugar. Miani og malukpanong pagbatikos ang bangis nga dispersal.