Nanawagan ang mga grupong nanalipud sa tawhanong katungod alang sa hinanaling paglingkawas kang Sen. Leila de Lima human gibakwi sa duha ka yaweng “saksi” nga silang Roland “Kerwin” Espinosa ug Rafael Ragos ang ilang mga testimonyang naglambigit sa senador sa iligal nga droga. Nanawagan usab silang buhian ang susama niyang dili makatarunganong gipriso tungod sa gama-gamang mga kasong kriminal.

Sa iyang gipanumpaang salaysay atubangan sa midya niadtong Abril 28, gisulti ni Espinosa nga ang iyang mga pasangil batok kang De Lima sa duha ka pagdungog sa Senado niadtong 2016 pulos walay kamatuoran. Resulta kini sa pagpamig-ot, intimidasyon ug seryosong mga pagpanghulga sa iyang kinabuhi ug sa iyang pamilya.

Niadto usang Mayo 2, gisulti ni Rafael Ragos, kanhing officer-in-charge sa Bureau of Corrections, nga walay kamatuoran nga si de Lima nalambigit sa pagbaligya og droga sa New Bilibid Prison. Atubangan sa midya, gisulti ni Ragos nga gipwersa siya sa kanhing Justice Secretary Vitaliano Aguirre II aron motestigo batok kang De Lima. Matud niya, giinteroga, gipwersa ug gihulga siya ni Aguirre aron angkunon ang mga pasangil nga wala nahitabo.

Matud sa mga kritiko sa gyera kontra-droga, ginapatud-an lamang sa ulahing mga panghitabo nga ang kaso batok kang De Lima usa ka pagpanimalos sa pulitika tungod sa pagkakritikal niya sa brutal nga kampanya kontra-droga sa rehimeng Duterte. Panawagan nila, kinahanglang panubagon ang mga tawong responsable sa iyang dili makatarunganong detensyon ug mga paglapas sa iyang tawhanong katungod.

Samtang, giangkon ni Rodrigo Duterte nga “kahambugan lamang” ang iyang saad nga pagasulbaron niya ang problema sa iligal nga droga sulod sa unum ka bulan sa iyang panggamhanan.