Sang Abril 13, ginpirmahan ni Rodrigo Duterte ang RA 11696 ukon “Marawi Siege Victims Compensation Act of 2022.” Sa idalom sini, magatukod sang ahensya nga magaproseso sa paghatag sang kumpensasyon o bayad danyos sa mga biktima sang pagpamomba sang rehimen nga nagwasak sa Marawi City sang 2017. Bisan pa man, indi maathag sa layi kon pila ang mabaton sang kada biktima. Wala man ini sang pondo sa subong nga badyet kag sa 2023 pa maupod sa pungsodnon nga badyet.

Ginkilala sang Marawi Advocacy Accompaniment (MAA), grupo sang mga lider Meranaw kag organisasyon sang Moro, ang pagpasar sa RA 11696. Pero siling sini, dapat kadungan sang kumpensasyon ang pagsiguro sa basehan nga mga kinahanglanon sang mga bakwit kag pagpatuman sang ila luwas kag dungganon nga pagbalik sa syudad. Ginpakamalaut sang grupo ang bao-kahinay nga rehabilitasyon kag rekonstruksyon sang Marawi.

Ginapabugal sang Task Force Bangon Marawi (TFBM) nga sa palaabuton nga Hunyo o antes magpanaog si Duterte sa pwesto 95% kumpleto na ang rehabilitasyon sang syudad. Ang matuod, mayorya sa mga residente wala pa gihapon ginapahanugutan nga makabalik sa syudad, sa pihak sang pagsumiter nila sang mga rekisito nga papeles. Ginadumilian man nga magbalik ang mga nagapuyo sa Barangay Padian, bisan pa may ara sila nga titulo sa duta, bangud sa pagahimuon nga reklamasyon sa Lake Lanao. Rason sang Bangsamoro Transition Authority, “wala sang epekto ang mga titulo sa duta, bangud ginapanag-iyahan na ini sang gubyerno.”

Sa Mayo 23, anom ka tuig na halin sang salakayon kag pulbuson sang rehimeng Duterte ang syudad sang Marawi.