Duha (2) patay kag isa (1) pilason sa mga katapo sang Alpha Coy sang 62nd IBPA sang madinalag-on nga ginharas sang yunit sang Leonardo Panaligan Command-New People’s Army ang 62nd IBPA Advance Coy Detachment nga nahamtang sa sityo Casingan, Brgy Trinidad. Agosto 30, 2022 alas 6:00 sang hapon sang ginharas sang yunit sang NPA ang nasambit nga pasistang tropa.

Ang aksyon militar sang NPA ang nagakaigo nga sabat sang mga pulang hangaway sa padayon nga militarisasyon kag masingki nga pagpanglapas sang tawhanon nga kinamatarung sang mga sibilyan kag inosenteng mangunguma sang desperado nga 62nd IBPA sa Central Negros.

Sabat man ini sang NPA sa mga kabutigan kag pagpatalang nga ginakupal ni Maj. Gen. Benedict Arevalo sang 3ID, B/Gen. Inosencio Pasaporte sang 303rd BdePA kag NTF-Elcac Guihulngan nga kuno ara na sa lebel sang pagkawasak ang rebolusyonaryong hublag ilabe na ang CPP-NPA sa Central Negros bangud pa sang madamo nga nagsurender, mga engkwentro kag masobra sa 70 ang NPA nga na nyutralisa. Ang matuod desperado ang AFP nga wasakon ang CPP-NPA sa Central Negros bangud wala sa ila ang suporta sang masa. Terorista kag pasista ang tatak sang AFP sa mata sang mga mangunguma kag malapad nga pumuluyo. Preska pa sa huna-huna sang masa ang pagmasaker sang 62nd IBPA sa pamilya Jacolbe sa sityo Banderahan, Brgy Trinidad sadtong Hulyo 26, 2022. Nagpatay kay Cristina Jacolbe nga nagabusong kag isa ka manunudlo. Kadungan sini nga hitabo ang pagpatay sa menor-de-edad nga 16 anyos kag estudyante nga si Everly Kee Jacolbe anak nga babaye ni Cristina kag Rodan Montero. Subong man ang pagtiro patay kay Pompeo Landisa nga isa man ka mangunguma, pagrapido sa mga sibilyan nga sanday Boyet Cezar, Marjun Mahinay sang sityo Kambairan, Trinidad kag pagpaniro man sang nasambit nga tropa militar sa mag-utod nga sanday Jercel kag Onil Gonzaga sang Brgy Maniac tanan sang Guihulngan, Negros Oriental.

Patalang kag kabutigan ang ginataghol ni Arevalo kag Pasaporte nga kuno lehitimo nga engkwentro kag katapo sang NPA ang mga biktima. Wala sang ikasarang ang pasistang militar sa pagwasak sang CPP-NPA base sa maragtason na nga ekperyensya sang masa kag bug-os nga rebolusyonaryong kahublagan sa isla kag pungsodnon nga sakop.

Kon nagatikal si Rodrigo Duterte sadto nga wasakon ang rebolusyonaryong kahublagan sa iya 6 ka tuig nga termino, ang kamatuoran kag saksi ang pumuluyo nga “wala kaubos sang iya sinamo si Duterte” sa basehan nga natapos lang ang iya administrasyon ang CPP-NPA kag bug-os nga rebolusyonaryong hublag padayon nga nagaluntad, nagasulong kag naga-uswag upod sa mabaskog kag nagalapad nga paghimakas sang pumuluyo batok sa imperyalismo, burukrata-kapitalismo kag pyudalismo.

Segurado ang LPC-NPA nga “indi man kaubos sang ila sinamo” si Arevalo kag Pasaporte sa pagpakig-away sa CPP-NPA sa Central Negros. Ang tinikal kag kabutigan sang 3ID kag 303rd BdePA paagi sa ila mga kumander ang nagpabilin nga desperasyon upod sa ila nga pasistang hanay bilang mga “tigreng-papel.”