Mabaskog nga ginakondenar sang Leonardo Panaligan Command ang illegal nga pag-aresto sa kumbinado nga pwersa sang PNP-Guihulngan kag katapo sang 62nd IBPA as isa habal-habal driver kag mangunguma nga si Roldan Baydal sang Sityo Punong, Barangay Trinidad alas 2:00 sang kaagahon samtang mahamuok ang katulugon. Gintamnan naman sang armas luthang ang biktima kaangay sang 38 caliber pistol, rifle grenade kag mga bala kag ginpasakaan sang mga hinimu-himo nga kaso.

Desperado ang nasambit nga mga pasistang pwersa sang estado sa paglagas sa NPA. Tuyo sang militar kkag mga kapulisan nga isabwag ang kahadlok sa lugar para perwisyuhon ang mga pumuluyo sa eskima sang pilit nga pagpasurender nga padugi sang NTF-Elcac. Dugang pa ang pagpaindisanay sang mga tropa militar sa pag-angkon sang mga reward kag medalya nga kuno kadalag-an naman nga ginapadayaw ni Maj. Gen. Benedict Arevalo sang 3ID sa pagnyutralisa sa New People’s Army nga naga-operar sa sakop sang Central Negros.

Tubtob sa karon, lapnagon sa gihapon ang operasyon militar nga ginsakop ang mga lugar sang Barangay Quinten Remo, Barangay Macagahay, Moises Padilla, Barangay Puso, La Castellana kag sityo Tuko, Barangay Trinidad, Guihulngan sa diin nagakampo ang mga ini sa mga komunidad kag simbahan, kag mga pampubliko nga pasilidad.

Ang masingki nga militarisasyon nga ginalunsad sa pasistang 62nd IBPA sa kaumabahn sang Central Negros ang paghinabon sang ila kapalpakan kag kabutigan.

Hatagan hustisya ang mga biktima sang katawhan nga kinahimatarung! Mga pulang hangaway sang banwa idalum sa Leonardo Panaligan Command, magpakamaayo sa inisyatiba sa paglunsar sang lapnagon nga taktikal nga opensiba sa sakop larangan gerilya!