Mensahe sa BHB sa ika-53 anibersaryo niini Ipataas ang kapasidad sa pagsukol sa BHB ug sa masa! Manglimbasog ug moasdang sa dalan sa malungtarong gubat sa katawhan!
Ang Komite Sentral sa Partido Komunista ng Pilipinas (PKP), kauban ang katawhang Pilipino ug ilang mga rebolusyonaryong pwersa, nagsaulog karong adlawa nga may tumang rebolusyonaryong kadasig ug kalagsik sa ika-53 nga anibersaryo sa Bagong Hukbong Bayan. Atong saulugon ang atong mga kadaugan sa miaging tuig ug ang mga kalampusan nga natigum sa miaging lima ka dekada sa armadong pagsukol.
Hugot namong ginasaluduhan ang tanang Pulang kumander ug manggugubat sa BHB ug tanang myembro ug reserba sa milisyang bayan ug mga yunit depensa sa mga rebolusyonaryong organisasyong masa sa mga natarang gerilya nga determinadong nag-asdang sa demokratikong rebolusyon sa katawhan ug sa kawsa sa sosyalismo.
Niini nga okasyon, among gipasidunggan ang tanang bayani ug martir sa rebolusyong Pilipino nga mihatag sa tibuok nilang kinabuhi sa kawsa sa nasudnon ug katilingbanong kalingkawasan. Espesyal namong gipasidunggan silang Ka Menandro Villanueva ug Ka Jorge Madlos, parehong nasudnong kumander sa BHB ug nangulong kadre sa Partido. Ang ilang bug-os nga pagserbisyo ug bililhong tampo sa rebolusyon kanunay mahinumduman ug magsilbing inspirasyon sa bag-ong henerasyon sa mga rebolusyonaryong manggugubat.
Ang makanunayong krisis sa nagharing semikolonyal ug semipyudal nga sistema padayong nagpahagba ug midaot sa kahimtang sa panginabuhi sa katawhan. Nag-antus ang mayorya sa katawhan sa magun-ubong epekto sa todong neoliberal nga palisiya sa ekonomiya nga gipahamtang sa International Monetary Fund ug mga langyawng tigpautang. Minilyong katawhan ang nag-antus sa kaylap nga kawalay trabaho, ubos nga suhulan ug sweldo, pagkawala sa kita, pagtaas sa presyo, labawng nagkabug-at nga buhis, kakulang sa pangpublikong panglawas, edukasyon ug uban pang importanteng serbisyo, pagtapun-og sa mga langyawng sobrang produkto, imperyalistang pagpangawkaw sa kadagatan, kalasangan, kasubaan ug kayutaan sa nasud, pyudal nga pagpahimulos, ug burukratikong korapsyon.
Sa desperasyon niining mapreserbar ug maseguro ang interes sa mga imperyalistang bangko ug monopolyong kumpanya ug sa mga nagharing hut-ong sa dagkung burgesya-kumprador ug dagkung agalong yutaan, ang neokolonyal nga rehimen, sa suporta sa gubyernong US, mipaling ngadto sa dayag nga terorismo sa estado ug pasistang pag-atake batok sa katawhan aron sumpuon ang ilang patriyotiko ug demokratikong tinguha. Labaw nga nahimong mas grabe ug brutal ang maong mga atake. Kadungan niini, labaw nga giablihan sa papet nga rehimeng Duterte ang ekonomiya sa 100% langyawng pagpanag-iya sa mga pangpublikong yutilidad ug serbisyo, nga hingpit nga midenasyunalisa sa ekonomiya sa Pilipinas pabor sa mga langyawng monopolyong buwitre.
Hugot nga nakalambigit ang nagkagrabeng kahimtang sa ekonomiya ug pulitika sa nasud sa malungtarong krisis sa istagnasyon sa pangkalibutang sistemang kapitalista. Padayong natay-og ang ekonomiya sa Pilipinas atubangan sa hinay nga demand sa mineral ores, prutas ug mga semi-manupaktura nga ubos ang dugang-bili. Ang kumpetisyon sa ekonomiya ug pulitika tali sa mga nag-unang kapitalistang gahum, ang US ug China, nagyagyag sa grabeng krisis tungod sa sobrang produksyon ug sobrang akumulasyon sa kapital sa monopolyong burgesya ug ang taas nga potensyal sa gubat sa East Asia tungod sa iligal nga pag-angkon sa China sa kapin 90% sa South China Sea. Sa kasamtangan, miulbo sa Ukraine ang dayag nga armadong panagsangka bunga sa pagpalapad sa NATO ug pagtumaw sa pasismo nga mibiktima sa katawhang Russian sukad 2014. Gigamit sa US ug NATO ang papet nga rehimen niini sa Ukraine isip tinugyanan aron hagiton ang Russia nga nakadesisyong ilhon ang republika sa katawhan sa rehiyon sa Donbass ug miduso sa mutual defense treaty niini isip mayor nga sukaranan sa gitawag niining mga espesyal nga operasyong militar aron batukan ang walay puas nga atake sa Donbass ug nagsingabot nga hulga sa seguridad sa Russia.
Sa tibuok kalibutan, nag-antus ang proletaryado ug naghagong katawhan sa nagkagrabeng kahimtang ug gipukaw aron ilunsad ang mga anti-imperyalista ug demokratikong pakigbisog ug rebolusyonaryong mga aksyon. Ang mga imperyalistang gahum mismo ang nag-unang hinungdan sa kaguliyang sa katilingban ug peligro sa gubat sa tibuok kalibutan. Ang pagdugang sa duha ka imperyalistang gahum ngadto sa mga tradisyunal, mipasamot sa kinatibuk-ang krisis sa pangkalibutang sistemang kapitalista ug nagpakusog sa inter-imperyalistang kontradiksyon nga mipatong sa uban pang mayor nga kontradiksyon, sama tali sa kapital ug pamuo, tali sa imperyalistang gahum ug sa dinaugdaug nga katawhan ug nasud, ug tali sa mga imperyalistang gahum ug nasud nga nagduso sa nasudnong kagawasan ug sa ilang sosyalistang pangandoy.
Gipailalum ang lapad nga masa sa katawhang Pilipino sa nagkagrabeng porma sa pagpangdaugdaug ug pagpahimulos tungod sa lokal ug pangkalibutanon nga mga hinungdan. Ang grabeng kadaut sa kahimtang sa katawhan, kaylap nga paglapas sa ilang mga demokratikong katungod ug gipagrabeng kampanya sa saywar ug dis-impormasyon hingpit nga mibutyag sa dunot nga uyok sa nagharing sistema. Nagmugna kini og mga paborableng kundisyon aron pukawon, organisahon ug palihukon ang pinakadaghang katawhan. Samtang nagkagrabe ang krisis sa nagharing sistema, labaw nga mahinangpon sa rebolusyonaryong propaganda ug kalihukan ang mga progresibo hut-ong ug positibong pwersa.
Nahimong mas paborable ang kondisyon sa kabanikanhan sa Pilipinas alang sa paglunsad sa malungtarong gubat sa katawhan. Minilyong pamilyang mag-uuma ang grabeng nag-antus sa mapahimuslanong pyudal nga singil sa abang, dili patas nga presyo sa ilang mga produkto ubos nga suhulan sa mga mamumuong panguma, kumbersyon ug pagpangilog sa yuta, ingonman sa madaugdaugong mga operasyong militar. Ang madaugdaugong kahimtang sa masang mag-uuma padayong mitukmod kanila nga mosukol ug mag-armas, sa ingon, mipakusog sa BHB ug milahutay sa dalan sa gerilyang pakiggubat, atubangan sa unum ka tuig nga estratehikong opensiba sa kaaway.
Malampusong gipakyas sa Partido ug BHB ang balik-balik nga deklarasyon ni Duterte ug sa iyang mga heneral militar nga dugmukon ang armadong pagsukol sa katawhan. Syempre, nakasinati usab kini og mga kapildihan, tungod sa pipila ka internal nga mga kahuyangan ug mga kakulian, partikular sa paghaum bag-ong kahimtang militar tungod sa bag-ong arsenal sa mga armas ug mga estratehiya sa kaaway nga nag-obliga sa BHB nga magpatuman og mga bag-ong mga pamaagi ug taktika sa gerilyang pakiggubat. Ingonman, ang paglahutay ug mga kalampusan sa BHB sa mga natarang gerilya, padayong nagpamatuod sa pulitikanhong superyoridad sa gubat sa katawhan kumpara sa gubat sa kaaway batok sa katawhan.
Sa giya sa Marxismo-Leninismo-Maoismo, kinahanglang hait ug kritikal sagupon sa Partido, BHB ug sa tanang rebolusyonaryong pwersa ang sitwasyon ug hugot nga huptan ang mga hinanaling tahas nga kinahanglang ipatuman aron magpakusog ug iasdang ang rebolusyon. Kinahanglang magpadayon ang tanang manggugubat sa BHB, kadre sa Partido ug aktibista sa pagpalig-on sa ilang kaugalingon sa ideolohiya, pulitika ug organisasyon ug mag-andam sa mas dakung pakigbisog sa umaabot nga panahon. Kinahanglan natong pangandaman ang pagpaling sa kaaway sa mas grabeng kabangis ug pagbubu sa tanang rekursp sa kontra-rebolusyonaryong kampanya niini sa terorismo ug pagpanghadlok sa katawhan. Kinahanglang tigumon nato ang tanan natong tinguha ug kusog, mag-andam sa mas dagkung sakripisyo, ug paningkamutan nga pakyason ang mga plano sa kaaway ug iasdang ang rebolusyon ngadto sa mas taas nga ang-ang.
Labaw nga palugwayon sa inter-imperyalistang armadong panagbangi ang pangkalibutang krisis sa kapitalismo
Padyong nagkagrabe ang walay kasulbaran nga malungtarong krisis sa pangkalibutang sistemang kapitalista samtang nag-atubang ang mga monopolyo kapitalista sa problema sa sobrang produksyon dungan sa pagtaas sa lebel sa wala mabaligya nga mga imbentaryo ug padayon nga pagsagayad sa presyo sa mga palaliton ug tantos sa ganansya. Sa samang higayon, ang grabeng kawalay kaangayan ug makihut-ong nga pagpahimulos tataw nga makita sa pagpanag-iya sa mga bilyunaryo, nga naglangkub sa mas ubos pa sa 1% sa populasyon, sa 50% sa pangkalibutang bahandi ug kabtangang pangpinansya. Dugay nang naghulga nga moulbo ngadto sa dayag nga armadong panagsangka ang kumpetisyon tali sa magkaribal nga mga imperyalistang nasud alang sa merkado ug natad sa impluwensya, ilabina sa pagkontra sa mga imperyalista sa US sa China ug Russia sa pagpalapad niini sa merkado sa lana ug natural gas, mga armas militar, elektroniko, mga sakyanan, ug uban pang yaweng igbabaligya.
Human mahimong nag-inusarang superpower sa pagkahagba sa Soviet Union niadtong 1991, nagkumpyansa ang US nga ibalhin sa China ang pagmanupaktura, pagpataas sa pamuhunan ug pamatigayon, ug pagbalhin sa teknolohiya labaw sa lebel sa mga pabrika. Sa wala tuyoa, gipahuyang niini ang kaugalingong paggama ug pag-empleyo sa mga mamumuo. Nagkonsentrar kini sa produksyon sa mayor nga mga produktong high tech ug sa industriyang militar aron makabaligya og armas ug aron sudlon ang gasto kaayong mga gubat agresyon sama sa Iraq, Yugoslavia, Afghanistan, Libya, Syria ug uban pang nasud. Sa ikaduhang dekada lang niining siglo naamguhan sa mga estratehista sa US nga ang estratihikong pag-us-us niini ug nabalaka sa pagkusog sa ekonomiya ug militar sa China ug sa pagpalig-on sa ekonomiya sa Russia tungod sa dakung kita niini sa lana.
Miulbo ang proxy war sa US/NATO sa Ukraine batok sa Russia human ang walo ka tuig nga agresyon sa mga pasistang Ukrainian batok sa rehiyon sa Donbass sukad sa maduguong kudeta niadtong 2014 ug sa pipila ka bulan pagliyok tropang militar sa utlanan sa mga republika sa katawhan ug sa paturagas nga pagpanganyon sa imprastraktura sa mga sibilyan. Gisundan niini ang deka-dekada na nga kalapasan sa US ug sa mga kaalyado niini sa NATO sa 1991 Minsk security agreements diin gipasiguro sa Russia nga ang mga kaalyado sa kanhing Warsaw Pact dili mahimong myembro sa NATO. Sulod sa milabayng mga dekada, ang US ug NATO naglunsad og mga gubat agresyon ug interbensyon aron pugson ang mga nasud sa sidlakan ug sentral Europe nga moapil sa NATO, magbutang og mga ekipo militar sa US, ug magtukod og mga base militar ug mga pasilidad sa misayl ug anti-misayl aron palibutan ang Russia ubay sa mga utlanan niini.
Ang kontra-agresyon sa militar sa Russia ngadto sa Ukraine gilunsad isip “espesyal nga operasyong militar” aron depensahan ang katawhang Russian sa rehiyon sa Donbass batok sa pila ka tuig nang madaugdaugong mga palisiya ug walay hunong nga pagpanganyon sa Ukrainian nga gisuportahan sa US nga migrabe sayo niining tuiga. Sa mas estratehikong paagi, tubag kini sa agresibong pagduso sa mga imperyalistang US ug sa itoy nga rehimen niini ug mga pasistang kaalyado sa Ukraine sukad sa kudeta nga gisuportahan sa US niadtong 2014, nga paapilon ang Ukraine sa NATO nga mas makapalapad sa trinsera ug makapalig-on sa mga base militar ug surveillance posts nga gibutang sa US, UK ug NATO duul sa mga utlanan sa Russia.
Tumong sa Russia nga makab-ot ang mga kontra-agresibong tinguha niini sa “pag-demilitarize ug pag-denazify” sa Ukraine ug pagtapos sa gubat sa labing daling panahon pinaagi sa negosasyong pangkalinaw. Apan, nag-atubang kini karon sa posibilidad nga molungtad ang gubat sa Ukraine sa pagbubu sa US ug sa mga kaalyado niini sa NATO og mga tangke, jet fighter, misayl, bomba ug uban pang armas ug pondong militar ug ekonomiya para sa Ukraine. Nagpadayag og kaandaman ang gubyerno sa Ukraine nga tapuson ang gubat pinaagi sa pakigdayalogo ug pagdeklara sa nyutralidad niini apan ginahulhugan kini sa US ug NATO nga palanaton pa ang armadong pagsukol niini.
Subling gipamatud-an sa proxy war sa Ukraine nga ang imperyalismo nagpasabot sa gyera. Human sa makauulaw nga kapildihan ug pag-atras niini sa mga tropa sa Afghanistan sa miaging tuig human sa duha ka dekadang okupasyon, gikinahanglan sa imperyalistang US nga manghulhog og laing gubat aron padayong paandaron ang higanteng makina sa militar niini. Nakatakda kining mogasto og $13 bilyon aron magsuplay og mga armas sa Ukraine, ug magdeploy sa mga tropa niini sa kasikbit nga mga nasud nga sakop sa NATO.
Samtang naghatag og mga armas ug ayudang militar sa Ukraine, nagpahamtang usab ang US ug ang mga kaalyado niini sa NATO sa malangkubong mga sangsyon sa pinansya ug pamatigayon batok sa Russia. Apan ang masaligan lang sa US nga mopatuman niini mao ang EU, Canada, Japan, South Korea, Taiwan, ug Singapore, nga nagpakita sa dakung gintang sa mga imperyalistang gahum, ug nagtugot sa Russia sa pagpadayon sa negosyo ug pakigtransaksyon sa laing bahin sa pangkalibutang kapitalistang sistema. Ang United Kingdom, ang labing suod nga kaalyado sa US, nagsulting pahamtangan nila og mga sangsyon sa lana ang Russia, apan magsugod lamang kini sa katapusan sa tuig.
Ang mga sangsyon nga gipahamtang sa US butang nga gikasuko usab sa mga nasud sa Europe kansang naga-import sa halos 50% sa mga suplay sa natural gas niini gikan sa Russia. Ubos sa pagpamugos sa US, gikansela sa Germany, nga naga-import og 65% sa natural gas gikan sa Russia, ang mga kontrata alang sa operasyon sa Nord Stream 2 gas pipeline nga magdoble unta sa suplay sa natural gas nga ginadeliber sa Russia. Ang tumong sa US mao ang pugson ang mga nasud sa Europe nga mag-import og mas daghang liquefied natural gas (LNG) ug mosalig sa US sa subling pagtukod sa imprastraktura sa enerhiya niini, lakip ang pagtukod og mga terminal ug mga bodega. Sukad 2016, gipakusog sa US ang kapasidad niini sa LNG ug gilaumang mahimong pinakadakung prodyuser niini sa kalibutan sa katapusan sa tuig.
Ang mga sangsyon sa lana sa Russia nagresulta sa pagkabalda sa suplay ug gipahimuslan sa mga monopolyong kumpanya sa lana, mga nasud nga nagaprodyus og lana, mga tigpamuhunan sa pinansya ug mga hedge fund (pondong gunit sa dagkung kapitalista sa pinansya) nga nalambigit sa ispekulasyon sa lana aron ipataas ang presyo sa krudo ug mga produkto sa petrolyo. Gideklara sa Saudi Arabia nga walay kakulang sa suplay. Ang US mismo, nga naga-import sa dakung bahin sa lana niini gikan sa Russia, nangagpas nga magpalit og lana sa Venezuela, usa ka nasud nga nakapailalum sa pagpamig-ot niini.
Pipila lang ka bulan ang milabay, malipayong mideklarar ang mga imperyalistang ahensya nga nakab-ot na nila ang “economic rebound” o subling pagbangon sa ekonomiya sa miaging tuig human ang pangkalibutang pagtiurok sa ekonomiya niadtong 2020. Apan, paspas nga nakagukod ang kapitalistang krisis. Ang pagtaas sa presyo sa mga produktong petrolyo mitukmod sa pagsaka sa gasto sa produksyon ug naghulga nga labaw pang malanaton ang krisis sa pangkalibutang sistemang kapitalista. Ang mitumaw nga grabeng implasyon (paspas nga pagsaka sa presyo) ug sa posibleng istagplasyon naghulga nga subling maglunang sa resesyon ang mga kapitalistang sentro bisan pa nga kadaghanan sa mga nasud wala pa makasugakod gikan sa mga lockdown ug pagkabalda sa negosyo nga gipahamtang atol sa pandemyang Covid-19.
Naglunang pa gihapon sa krisis ang pangkalibutanong mga sentro sa kapitalismo ug gihampak sa mga problema sa huyang nga produksyon ug nagkadakung utang. Sulod sa milabayng duha ka tuig, nagmugna ang gubyerno sa US sa nagkasaksak-sinagol nga neo-Keynesian nga mga pakete sa paggasto nga gitawag karon og Building a Better America nga programa diin plano niining mogasto og $3 trilyon sa mosunod nga mga tuig sa sulayng pagrekober sa lokal nga produksyon. Gitay-og usab sa paghinay nga demand ang China, paghinay sa produksyon ug dakung kantidad sa dili mabayrang pangpubliko ug pribadong utang. Misaka pa ang pangkalibutang utang ngadto sa $303 trilyon, human sa pagsaka niini niadtong miaging tuig, sa desperadong pagsulay sa pagluwas sa mga kumpanya, paghatag og mga subsidyo ug pagrekober sa produksyon.
Anaa sa lingtunganay sa pangkalibutang krisis sa kapitalismo ang dili masulbad nga problema sa sobrang produksyon, sobrang suplay sa mga palaliton ug sobrang akumulasyon sa kapital sa dominanteng monopolyong burgesya bunga sa kapitalistang kumpetisyon ug anarkiya sa produksyon. Adunay sobrang suplay sa puthaw, mga sakyanan, sapot ug sapatos, lana, lugas ug uban pang mayor nga produkto. Tungod sa temporaryong kanihit sa mga elektronikong semiconductor sa miaging tuig, nangagpas sa pagpamuhunan sa mga bag-ong pabrika sa US, Netherlands, China, Taiwan, Japan, South Korea ug uban pang mga nasud, ug gilauman nga magresulta sa sobrang suplay ilabina sa mga low-end chips sugod sa katapusan sa tuig.
Ang kapitalistang kumpetisyon nagtukmod sa mga kaatbang nga magpadaghan sa produksyon ug pagpamuhunan og mas dakung kapital sa mga makina, robot, artificial intelligence ug mas bag-ong mga teknolohiya, ug mas ubos sa suhulan, nga mosangpot sa pagkunhod sa kita. Tinuod kini bisan sa pinakadakung kapitalista, diin mayorya kanila naglutaw sa gipaburot nga pinansya pinaagi sa mga ispekulasyon sa stock ug financial market.
Padayon ang pagpaling sa US ug uban pang mga sentro sa pangkalibutang kapitalismo sa Keynesianismong militar aron magpadayon ang produksyon. Ang badyet sa depensa niini miburot ngadto sa $776 bilyon sa 2021 (bisan pa sa pagwidro gikan sa Afghanistan) ug gitakdang motubo pa ngadto sa $782 bilyon sa 2022. Gideklara usab sa Germany ang mga plano nga mas patas-an ang paggasto sa depensa ngadto sa $113 bilyon, subay sa usa ka kasabutan sa NATO nga maggahin og 2% sa GDP niini alang sa depensa.
Padayong nagkakusog ang pundamental nga kontradiksyon sa kapitalista tali sa sosyalisadong produksyon ug pribadong akumulasyon sa sobrang bili, samtang labaw nga nakakonsentra ang bahandi ug kapital sa kamot sa pipila ka monopolyo kapitalista. Sukad 2020, ang kolektibong bahandi sa 704 ka bilyonaryo sa US mitubo ngadto sa $1.7 trilyon ug nag-angkon sa mas daku pang bahandi kaysa 165 milyon nga Amerikano. Niadtong 2020 lamang, midaku og $1.5 trilyon ang bahandi sa pinakadatung Chinese.
Sa pikas bahin, nag-antus ang masang mamumuo ug naghagong katawhan sa nagkagrabeng mga porma sa pagpahimulos ug pagpangdaugdaug ug nagkadaghan ang naglunang kagutom, grabeng kalisud ug kahimtang sa katilingban. Gatusan ka milyon ang nawad-an og trabaho ug kita. Ang kita sa kapin100 milyon ka tawo mihagba ubos sa $1.90 kada adlaw, samtang kapin 163 milyon ang nabuhi sa mas ubos pa sa $5.50 kada adlaw.
Nagmugna ang nagkagrabeng sosyo-ekonomikanhong kahimtang sa kaylap nga mga protestang masa sa lain-laing bahin sa kalibutan aron suklan ang neoliberal nga mga lakang sa ekonomiya, pasistang pagpamig-ot ug mga imperyalistang gubat. Kinahanglang padayon nga magpalig-on sa kaugalingon ang rebolusyonaryong proletaryado ug sakmiton ang paborableng kundisyon aron pangulohan ang mga demokratikong pakigbisog sa dinaugdaug nga mga hut-ong ug progresibong sektor.
Labaw nga nahimong paborable ang mga kahimtang alang sa pag-asdang og rebolusyonaryong armadong pagsukol. Padayon nga miabante ang mga armadong pakigbisog sa India, Manipur, West Papua, Turkey, Kurdistan, Syria, Myanmar, Colombia, Peru ug uban pang nasud.
Gipagrabe sa imperyalistang mga palisiya ang krisis sa nagharing sistema ubos sa rehimeng US-Duterte
Sa miaging unum ka tuig, misamot ang krisis sa nagharing semikolonyal ug semipyudal nga sistema ug migrabe ang pag-antus sa katawhang Pilipino tungod sa neoliberal nga mga lakang sa ekonomiya, kakumbina sa militarisasyon sa estado ug mga palisiya sa terorismo sa estado ubos sa rehimeng US-Duterte.
Ang mga lakang sa ekonomiya ni Duterte pinauyon sa mga palisiyang dikta sa gubyerno sa US, mga imperyalistang institusyong pinansyal ug langyawng mga ahensya sa credit rating (paggrado sa mga nasud subay sa kapasidad nga magbayad), ingonman sa lokal nga American Chamber of Commerce ug sa ilang mga lokal nga kasosyo. Kini nakapunting sa pagpalapad sa interes sa mga langyawng dagkung bangko ug korporasyon ug lokal nga mga alipures sa dagkung burgesya kumprador, dagkung agalong yutaan ug burukrata-kapitalista.
Sa milabayng mga dekada, miuk-uk ang ekonomiya sa nasud ug nagpabiling atrasado, agraryo ug dili industriyal tungod sa mga lakang sa ekonomiya nga gipahamtang sa mga langyaw. Pabiling nagsalig sa utang ug import ug nakapunting sa eksport ang produksyon. Ang limitado nga produksyon sa industriya ubos ang dugang-bili ug nag-unang lambigit sa pag-asembol o pag-package sa mga imported nga sangkap. Nagpabiling ginagmay ang agrikultura nga sagad nagagamit pa og de-manong himan sa uma, ug limitado kaayong gamit sa makinarya sa industriya.
Samot pang nagkadunot ang nagharing sistema ug dili na makatubag sa mga panginahanglanon sa katawhang Pilipino nga nag-antus sa kaylap nga disempleyo, hilabihan ka ubos nga suhulan, pagkawala sa kita, kawalay yuta ug pagpangilog sa yuta, pagsaka sa presyo, kakulang sa katilingbanong serbisyo ug uban pang grabeng sakit sa katilingban.
Labaw pang gibira paubos sa rehimeng Duterte ang nasud sa krisis. Sa milabayng unum ka tuig, midoble ang utang sa nasud gikan sa ₱6 trilyon sa 2016 ngadto sa kapin sa ₱12 trilyon sa niadtong Marso, ug gilaumang mosaka pa ngadto sa ₱13.42 trilyon sa katapusan sa tuig. Ang dinagkung korapsyon, pag-usik-usik ug anomalyang mga proyekto sa imprastraktura ug sobrang gasto sa militar nakapabangkrap sa gubyerno nga miresulta sa wala sukad na naabot nga depisito (kung asa mas daku ang gasto kaysa pundo) sa gubyerno nga mikabat sa ₱1.67 trilyon sa miaging tuig. Gitago ni Duterte ug sa iyang mga upisyal ang ilang kinawat ngadto sa mga bangkong Chinese ug uban pang langyawng account.
Gitugutan sa rehimeng Duterte ang mga imperyalista nga hugtan pa ang kontrol ug dominasyon sa lokal nga ekonomiya pinaagi sa pag-apruba sa giamyendahan nga Foreign Investments Act, Retail Trade Liberalization Act ug Public Service Act nga parehong naglikay sa mga limitasyon nga gitakda sa Konstitusyong 1987 batok sa hingpit nga pagpanag-iya ug operasyon sa langyaw sa mga negosyo. Kini nga mga balaod magatugot na karon sa mga langyawng kapitalista nga hingpit nga makapanag-iya ug mag-opereyt sa mga negosyo sa tanang natad sa pamuhunan, gawas sa depensa, sa mga pangpublikong kagamitan sama sa distribusyon sa elektrisidad ug tubig, ug sa mas gagmayng retail trade.
Agig pagsunod sa mga duso sa mga langyawng mga kapitalista ug sa ilang mga lokal nga dagkung kasosyo sa negosyo, giaprubahan ni Duterte ang CREATE law nga nagkibhang og 5% sa buhis sa mga korporasyon (nga katungbang sa ₱600 bilyon nga nawalang kita sa gubyreno sa sunod lima ka tuig) isip insentibo aron madani ang daghang langyawng pamuhunan. Bag-o lang usab niyang gilibkas ang moratoryum sa open-pit mining ug uban pang operasyon sa pagmina nga magtugot sa mga langyawng kumpanya sa mina nga dugang pang kawkawon ug pugaon ang rekurso sa mineral gikan sa kabukiran, kasubaan, kayutaan ug kadagatan sa nasud. Giaprubahan usab ni Duterte ang Rice Import Liberalization Law nga miresulta sa pagbaha sa imported nga bugas sa may subsidyo sa estado sa kaalautan sa mga mag-uuma sa humay nga padayong nag-antus sa ubos nga presyo sa pagpalit sa humay. Nag-antus usab ang mga mag-uuma sa utan ug mga prodyuser sa karne sa dili patas nga kumpetisyon taliwala sa kaylap nga ismagling sa takuban sa todong liberalisasyon. Gitugutan usab ni Duterte ang industriyang sa pagpangisda sa China sulod ug palibot sa kadagatan sa Pilipinas nga mihurot sa mga rekurso sa kadagatan sa nasud nga nagpalisud sa kinabuhi sa mga mangingisdang Pilipino.
Gipasamot sa kontra-katawhan ug kontra-kabus nga mga palisiya sa rehimeng Duterte ang kahimtang sa katawhang Pilipino. Ubos sa TRAIN law, gipas-an sa katawhan ang bug-at nga buhis sa mga palaliton ug serbisyo. Atubangan sa nagkadakung utang ug pagkawala sa kita tungod sa pagkibhang sa buhis sa dagkung mga korporasyon, ginaduso karon sa mga upisyal ni Duterte ang dugang nga mga buhis sa mga mamumuo, mag-uuma ug uban pang naghagong katawhan. Ang mas grabe pa, gigamit ni Duterte ug sa iyang mga alipures ang ilang gahum para magpadatu. Padayon nga migrabe ang korapsyon sa porma sa mga kikbak ug suhol bugti sa mga pabor sa gubyerno sa mga kontrata ug mga proyektong walay-kapuslanan sa katawhan, nga kung usahon molapas pa sa pag-usik-usik ilalum sa 14 ka tuig sa diktaduryang Marcos. Daghan niining mga tulay, kalsada sa baybayon ug reklamasyon sa yuta ang wala kinahanglana ug mihikaw sa tinubdan sa panginabuhian sa mga mag-uuma ug mangingisda.
Nag-antus usab ang katawhang Pilipino sa sobrang paggasto ni Duterte sa militar ug kapulisan alang sa sobra-sobrang pagpalit sa mga sarplas nga kagamitang militar gikan sa US, ug aron patas-an labaw sa istandard ang sweldo sa mga upisyal sa AFP ug PNP aron paliton ang ilang pagdapig. Tungod sa sobrang paggasto sa militar, nakahiagum sa kakulang sa pondo ug pagkibhang sa badyet ang pangpublikong edukasyon ug panglawas. Resulta niini, nag-antus ang mga estudyante, ang ilang mga ginikanan ug magtutudlo sa kakulang sa klasrum ug magtutudlo, sweldong pang-ulipon, ug kakulang sa imprastraktura alang sa distance learning ug mga pasilidad alang sa luwas nga pag-abli pag-usab sa mga klase. Gipatataw sa pandemyang Covid-19 ang grabeng kakulangon sa mga duktor, nars ug mga mamumuo sa panglawas sa mga pangpublikong ospital ug ang taas balayrunon sa laboratoryo ug pagpatambal. Hangtud karon, kulang pa gihapon ang badyet sa gubyerno alang sa pangpublikong panglawas, maong nagpabiling bulnerable sa subling pagdaghan sa mga impeksyon sa Covid-19.
Hilabihang nabug-atan ang lapad nga masang mamumuo ug mag-uuma sa pagsaka sa presyo sa gasolina, pagkaon ug uban pang batakang palaliton ug mga utilidad samtang naghakop sa higanteng kita ang mga kumpanya sa dagkung kumprador. Sa ilalum ni Duterte, nag-antus ang lapad nga masang mamumuo sa pagpamig-ot sa ug pagkibhang sa suhulan nga dili na makasugakod sa inadlaw nga galastuhon sa mayorya sa pamilyang Pilipino. Ang pagpahimulos ug pagpanaugdaug sa mga mamumuo gipagrabe kontrataktwalisasyon ug uban pang pleksibleng nga kahimtang sa pamuo. Sa kasyudaran, desperadong naghuot sa kabus nga mga komunidad ang minilyong walay trabaho, ang reserbang hukbo sa pamuo. Sa kabanikanhan, gatusan ka libong mag-uuma ang pugos nga gipalayas sa ilang yuta tungod sa kaylap nga kumbersyon ug pagpangilog sa yuta sa dagkung agalong yutaan, mga kumpanya sa mina, mga proyektong imprastraktura ug pagpalapad sa mga plantasyon. Sa kinatibuk-an, mokabat sa 70% sa mga Pilipino ang nabuhi sa kalisud, samtang 10% ngadto sa 15% ang anaa sa peligrong mahagbong sa grabeng kaalaot ug kakabus.
Aron ipreserbar ang estratehikong interes niini ug ang nagharing neokolonyal nga sistema sa Pilipinas, padayon nga gipalig-on sa imperyalismong US ang mga pwersa sa depensa ug seguridad sa itoy nga estado niini. Gihimo niining usa ka higanteng kuta militar ang reaksyunaryong estado aron ipahamtang ang pasistang gahum niini sa matag bahin sa nasud. Gipatuman sa US ang virtual operational control sa AFP nga nagsunodsunod sa doktrina sa kontra-insurhensya sa US, luyo sa pagkapildi sa mga kontra-insurhensya niini sa lain-laing nasud sa miaging pito ka dekada.
Gipalapad sa US ang impluwensya ug kontrol niini sa AFP ug nagbubu og pondo ug himang iggugubat pinaagi sa Mutual Defense Treaty, Visiting Forces Agreement, Enhanced Defense Cooperation Agreement, ug Operation Pacific Eagle-Philippines niini. Permanenteng nakaistasyon sa Pilipinas ang mga tropang Amerikano, kahimanang militar ug armas. Aron pahugton ang koordinasyon ug kontrol sa operasyon niini sa AFP, nagpahigayon ang US og 1,300 ka bilateral nga aktibidad militar sa Pilipinas ug 850 beses nga pagdunggo sa ilang mga barkong iggugubat sa miaging unum ka tuig.
Ubos sa direksyon, pagplano ug pagpondo sa mga ahente sa US Central Intelligence Agency ug mga magtatambag militar sa Amerika, midangop ang reaksyunaryong estado sa Pilipinas sa walay pulos nga pasistang mga palisiya, dayag nga pagpanumpo sa demokrasya ug brutal nga pag-atake batok sa katawhan kung asa ang tibuok burukrasya gipailalum sa ang mando sa mga heneral ug mga upisyal sa depensa. Milampos sila sa pagbutang sa kontra-insurhensya ug anti-komunistang pagpanumpo sa sentro sa palisiya sa estado, kung asa gipadaku nila ang gahum sa militar ug pulis, ug gibuhian ang mga pwersang pangseguridad sa estado aron sumpuon ang bataka ug pundamental nga mga demokratikong katungod ug kagawasan, nga mitarget sa mga aktibista, kritiko ug oposisyon sa pulitika.
Giusab ang burukrasya sa gubyerno aron ibutang ang mga sibilyang ahensya sa estado ubos sa kontrol sa National Task Force-Elcac, nga sa pagkatinuod usa ka civil-military junta (huntang sibil-militar) nga maoy aktwal nga nagamando sa tibuok gubyerno. Niadtong 2020, giaprubahan ang balaod bahin sa terorismo sa estado (gitawag og Anti-Terrorism Law) nga naghatag sa estado og labing dautan nga gahum nga lapas sa batakang mga katungod ug hudisyal nga proseso.
Kaylap ang mga pag-abuso sa militar ug pulis sa tibuuk nasud, pareho sa kasyudaran ug kabanikanhan. Sa kasyudaran, gipailalum sa mga ahente sa militar ug pulis ang mga unyonista, organisador sa komunidad, mga aktibistang kabatan-onan ug kababayen-an, ingonman ang mga tigpanalipud sa tawhanong katungod, mga progresibong lider relihiyoso, mga magtutudlo ug mga health worker sa pagpaniktik, harasment, arbitraryong pag-aresto ug ekstrahudisyal nga pagpatay. Mas grabe ang kahimtang sa kabanikanhan, bisan og adunay daghang kaso sa pag-abuso sa militar ug paglapas sa tawhanong katungod ang wala mareport.
Gipapha sa kaaway ang kalainan tali sa mga manggugubat ug mga sibilyan. Arbitraryong giakusahan niini ang mga tawo nga komunista o tigsuporta sa komunista ug gigamit ang ATL aron hatagag rason ang grabeng paglapas sa katungod ug kagawasan sa katawhan. Gilikusan niini ang mga komunidad gamit ang dakung ihap sa tropa sa pagreyd sa mga balay sa mga mag-uuma sa gabiing daku o kaadlawon sama sa Oplan Sauron sa Negros, ang pagmasaker sa mga minoryang Tumandok sa Capiz ug ang Bloody Sunday nga dinaghang mipatay sa mga aktibista sa Southern Tagalog.
Sa tanang bahin nasud, gipailalum sa balaod militar ang tibuok o klaster sa mga baryo nga nagpalisudlisud sa mga komunidad sa mga mag-uuma. Nagtukod ang mga yunit sa AFP og mga detatsment o ginahimong baraks ang mga istrukturang sibilyan, nagbutang og mga gwardya sa palibot aron bantayan ug kontrolon ang lihok sa katawhan, nagmuntar og mga tsekpoynt aron makontrol ang komersyo (sa takuban sa pagbalda sa suplay sa pagkaon sa NPA), pugngan sila sa pag-atiman sa ilang mga umahan ug magkaingin panahon sa mga operasyong militar, ug pagbawal sa masa sa pagpalapad sa ilang mga umahan o pagpataas sa produksyon (sa rason nga ang ilang dugang ani ipakaon sa NPA). Walay hunong nga giharas sa mga pasistang tropa ang masang mag-uuma, arbitraryong gipasanginlan sila nga nagsuporta sa rebolusyonaryong kalihukan, gipagawas nga mga “surrenderee”, gipailalum sila sa pagpaniktik, gina-atake ang ilang mga panimalay sa kagabin-on, pugos silang ginapaluwat sa ilang mga organisasyon, pagkidnap o pag-aresto subay sa pekeng mga kaso ug pagpatay sa mga lider mag-uuma ug aktibista.
Luyo sa balikbalik nga deklarasyong huyang na ang BHB ug madugmok sa dili pa mahuman ang termino ni Duterte, padayon nga gipadaghan sa AFP ug PNP ang mga kontra-gerilya nga pwersang pangkombat niini. Sa kasamtangan, adunay 166 ka batalyong pangkombat sa Army, Air Force, Marines, Scout Rangers, Special Action Forces ug uban pang yunit sa militar ug pulis nga gideploy batok sa NPA, nagungan og 21 kaysa miaging tuig. Sa maong gidaghanon, nagdeploy ang AFP og 5 ngadto sa 6 ka batalyon batok sa prayoridad o gipokusan niining subrehiyonal o natarang gerilya sa NPA, ug nagdeploy og 2 ngadto sa 3 sa dili prayoridad nga mga erya. Nagtukod ang AFP ug PNP og giusang kumand ug operasyon.
Nahimo sa AFP ug PNP nga dugangan ang deployment niini sa mga tropang pangkombat batok sa BHB pinaagi sa pagtukod og bag-ong mga yunit ug batalyon ug pag-redeploy og mga pwersa gikan sa mga erya sa Moro human sa pagsurender sa Moro Islamic Liberation Front. Migasto ang AFP sa dili mominus ₱900 milyon para magtukod og bag-ong dibisyon (ang 11th ID) nga gikatakdang ideploy sa Sulu ug Tawi-Tawi nga hugot nga pagakontrolon sa mga pwersang militar sa US nga permanenteng nag-operasyon sa lugar. Pipila ka batalyon sa PNP special action forces ang gitukod usab niadtong miaging tuig.
Halos 60% niini nga mga tropang pangkombat nakakonsentra sa lima sa 13 ka rehiyon, nga mao ang Southern Tagalog, Eastern Visayas, Southern Mindanao, Bicol ug North Central Mindanao. Adunay dakung pagsaka sa deployment sa mga tropa sa Far South Mindanao, Negros, Southern Mindanao, Eastern Visayas, Cagayan Valley ug Southern Tagalog. Tumong sa AFP nga maglunsad og dinagku ug nakapokus nga mga operasyong militar, ikoordina ang nagkalain-laing sanga niini ug gamiton sa hingpit ang tibuok arsenal niini batok sa mga pwersang gerilya sa BHB.
Dugang pang midaku ang badget ni Duterte para sa militar ngadto sa ₱221 bilyon karong tuiga gikan sa ₱217 bilyon sa miaging tuig. Bisan pa sa kwestiyunableng paggasto, labaw pang midaku ang badyet sa NTF-Elcac ngadto sa ₱17.5 bilyon (gikan sa ₱4.2 bilyon) bisan og ₱10 bilyon niini gitakdang walay partikular nga gigahinan. Sa milabayng unum ka tuig, nakadawat ang AFP sa sumatotal $1.14 bilyon nga kantidad sa ayudang militar sa porma sa Foreign Military Financing, mga programa sa pagbansay-militar ug uban pa. Binilyong piso ang gigasto sa rehimeng Duterte sa pagpalit sa mga pang-atake ug pangkumbat nga mga helikopter, jet fighter ug attack aircraft, kanyon ug artillery system, 500 ug 250 librang bomba, raket ug misayl, drone system, tangke, armored personnel carrier, kagamitan elektronikong paniktik ug komunikasyon, riple, bala ug uban pa. Migamit kini og mga GPS tracking system (pagpaniktik gamit ang satelayt, mga kamera nga susama ka gamay sa butones aron subaybayan ang lihok sa gerilya sa mga lasangong erya, mga ekipo alang sa pagpaniktik gami ang selpon, ug uban pa.
Kadungan niini, padayong ginaabagan sa US ang AFP sa pagtukod niini sa kapasidad sa cyberwarfare aron pakusgon ang internal nga sistemang pangkomunikasyon sa AFP para sa tukma sa panahong pagmonitor sa mga banatan aron ipataas ang kapasidad sa pagkumand ug pagpalihok sa mga pwersa. Padayon usab niining gibansay ang mga personahe sa AFP sa “pagkontrol sa dagan sa impormasyon” pinaagi sa mga saywar ug dis-impormasyon. Nagtinguha kini sa pulitikanhong pagpahuyang sa rebolusyonaryong kalihukan pinaagi sa pagparada sa mga “surrenderee” ug pagsulting sila “nalingla sa mga saad sa mas maayong kinabuhi,” pinaagi sa pagkriminalisa sa mga rebolusyonaryong pwersa gamit ang balaod, ug pagbalikbalik sa hinimohimong balita nga nakadawat kuno kini og “impormasyon gikan sa mga sibilyan” batok sa nag-opereyt nga mga yunit sa BHB. Tumong niining ipakita ang positibong imahe sa AFP pinaagi sa pagpakita sa mga proyektong “panginabuhian” o “pabalay” nga, sa pagkatinuod, wala makatubag sa lalum nga gamot sa kalisud ug pagpangdaugdaug sa masa. Sa samang higayon, gibansay sa AFP ang mga personahe niini sa cyberattacks (pag-atake gamit ang internet) sa mga website sa PKP ug NDFP, ug uban pang mga website nga kritikal sa rehimeng Duterte.
Samtang gipakusog ang kapasidad sa AFP nga mopatay gamit ang nagkadaghang armas sa tabang sa US, sa pagkatinuod, nagpakita sa nagkadakung estratehikong kahuyangan sa nagharing sistema. Gipakita niini nga aron mapreserba ang nagharing sistema, mas nagsalig sa armadong pagpanumpo ug mga pasistang pamaagi ang neokolonyal nga estado, kaysa sa pulitikanhong pagdani ug suporta.
Bisan paman, ang duso sa pagkab-ot sa nagkakusog nga superyoridad militar, adunay dautang epekto sa pulitika. Labaw pa niining gipasamot ang kultura sa gawasnong pasismo ug hingpit nga pagsalikway sa mga demokratikong katungod ug kagawasan sa katawhan nga mibutyag sa dayag nga pagdepensa niini sa interes sa mga nagharing madaugdaugon ug mapahimuslanong mga hut-ong ug, sa ingon, labaw pang nagpahimulag kanila sa katawhan. Gibalewala niini ang prinsipyo sa pagpatigbabaw sa sibilyan sa militar ug gipagamay ang luna alang sa demokratikong pagpadayag nga labaw pang nagpakita sa kahusto ug kamatarunganon sa rebolusyonaryong armadong pagsukol. Ang nagkadakung pulitikanhon ug ekonomikanhong gahum sa militar naghimo kanilang luwas sa kriminal nga tulubagon, hubog sa korapsyon ug patronage politics, ug nagpalalum sa demoralisasyon sa mga yanong sundalo nga gigamit isip pangbala sa kanyon. Kini nga mga estratehikong kahuyangan labaw pang gipagrabe sa mga paningkamot sa imperyalistang China nga magpalalum sa impluwensya niini sulod sa militar ug makighigala sa mga upisyal militar sa Pilipinas pinaagi sa pagpanuhol o mga ganting pinansyal.
Sa milabayng unum ka tuig, naghari ang reaksyunaryong estado ubos ni Duterte pinaagi sa terorismo ug kabangis sa estado batok sa katawhan, gikan sa peke nga “gubat kontra-droga” ngadto sa kontra-rebolusyonaryong gubat sa pagpanumpo. Liboan ka krimen ang nahimo sa mga pwersa sa estado batok sa katawhan lakip ang masaker sa mga sibilyan, pagdagit ug pagpatay sa mga aktibista, ingonman sa dili armadong mga rebolusyonaryo, pagpamomba gikan sa kahanginan ug pagpanganyon sa mga sibilyang komunidad ug uban pa. Padayon nga midaghan ang ihap sa mga binilanggo pulitikal nga gibalhog sa prisohan sa dugayng panahon.
Gikasilagan sa katawhang Pilipino ang rehimeng Duterte tungod sa korapsyon niini, pagpasakop sa langyawng gahum ug tiranikong paghari. Hilabihan kining nahimulag sa katawhan. Ang kahakog ni Duterte sa gahum ug mga pakana nga palanaton ang iyang pulitikanhong dinastiya aron malikayan ang pagkiha sa internasyunal o lokal nga mga korte tungod sa iyang mga krimen labaw nga mipasamot sa mga kontradiksyon sa magkaatbang nga paksyon mga nagharing hut-ong sa dagkung kumprador-agalong yutaan. Nagpabiling prayoridad ang mga planong kawaton ang eleksyon alang sa kampo ni Marcos-Duterte apan imposibleng mapatuman kini nga walay moulbong dakung protestang masa ug motay-og sa pundasyon sa pulitika sa nagharing sistema. Padayon nga nagkadaku ang mga pangmasang rali sa nag-unang partido sa pulitikanhong oposisyon samtang naghatag kini og luna sa pagpadayag sa katawhan sa ilang kasuko batok sa pasistang rehimen.
Nagkapuliki ang mga imperyalistang US nga dumalahan ang mga nanagbanging pundok ug pandayon ang mga pulitikanhong kasabutan alang sa malinawong transisyon human ang eleksyon. Karon pa lang, aduna nay nahulmang kompromiso sa han-ay sa mga nag-unang mga paksyon sa nagharing hut-ong aron suportahan ang Robredo-Duterte tandem alang sa umaabot nga eleksyon sa pagka-presidente ug bise-presidente. Tan-awon pa kung molampos ba ang mga imperyalistang US sa paghupay sa mga nanagbanging paksyon sa nagharing hut-ong kansang padayon nga nagkalalum ang pagkasiaksiak samtang labaw silang nagkahakog tungod sa nagkagrabeng krisis sa nagharing sistema. Sa samang higayon, anaa pa gihapon ang mga taho nga pwede pang pilion ni Duterte nga himuong presidente si Isko Moreno o pagagamitong rason aron kibhangan ang mga boto ni Robredo pabor kang Marcos.
Adunay kasigurohan o kaha daku ang posibilidad nga pagalimbungan ni Duterte ang pag-ihap sa mga boto ug gamiton ang nahabilin sa iyang termino sa Mayo ug Hunyo aron ideklara ang balaod militar ubos sa pasangil sa pagbatok sa pagsamoksamok sa oposisyon sa eleksyon ug sa mga “teroristang komunista” ug hawanan ang dalan alang sa “swabeng transisyon” ngadto sa iyang gipili nga mga manununod. Apan ang dagkung mga rali sa masa nga gipasiugdahan sa oposisyon, mga simbahan ug mga ligal nga demokratikong pwersa mabatukan o mapugngan ang iyang pagpanikas sa eleksyon ug magpahamtang og balaod militar o pag-andam sa lapad nga masa sa katawhan alang sa higanteng pag-alsa sama sa Edsa I ug Edsa II.
Unsaman ang resulta sa eleksyon sa Mayo, kinahanglang magpabiling matngon ang katawhang Pilipino sa pagpadayon sa ilang mga pakigbisog aron bawion ang ilang mga batakang kagawasan ug katungod, ug iduso ang ilang demokratikong mga pangandoy. Kinahanglan nilang suklan ug batukan ang kontra-insurhensya sa estado ug makig-away aron bungkagon ang kontrol sa militar sa tibuok gubyerno ug ipanghingusog ang pagtapos sa paghari sa impunidad ug tiranya.
Dugang pa, kinahanglang padayong palig-onon sa katawhang Pilipino ang ilang mga organisasyon aron ipadayon ang demokratikong rebolusyon sa katawhan aron lumpagon ang imperyalismo, pyudalismo ug burukrata kapitalismo, tapuson ang madaugdaugon ug mapahimuslanong semikolonyal ug semipyudal nga sistema, dugmokon ang itoy nga estado ug tukuron ug palig-onon ang demokratikong gubyerno sa katawhan ilalum sa pagpangulo sa proletaryado.
Pagpataas sa katakus sa NPA nga depensahan ang katawhan ug pakigbatok sa pasistang kaaway
Sa milabayng unum ka tuig, malampusong gipakyas sa BHB ang bangis ug dinagkung estratehikong opensiba sa kaaway ug ang mga deklarasyon niini sa pagtapos sa armadong rebolusyon sa dili pa matapos ang termino sa rehimeng US-Duterte. Napreserba niini ang mga pwersa pinaagi sa paglahutay sa dalan sa malungtarong gubat sa katawhan ug sa determinadong pag-asdang sa pakigbisog sa katawhang Pilipino alang sa tinuod nga kagawasan ug demokrasya.
Nagpakita og dakung kalig-on ug determinasyon ang mga Pulang manggugubat ug kumander sa BHB, ug ang mga kadre sa Partido nga nangulo sa BHB aron abagahon ang bug-at nga sakripisyo, patigbabawan ang tanang kalisdanan ug limitasyon, ug himuon ang tanan aron panalipdan ang katawhan batok sa pasismo ug terorismo sa estado. Andam silang isalikway ang tanang tinguha alang sa kaharuhay ug kasayon sa ilang pag-abaga sa malisud nga tahas sa paglunsad sa gubat sa katawhan. Mikuha sila og kalipay, kusog ug inspirasyon gikan sa masang mag-uuma nga bug-os nga gialagaran sa BHB, ug kansang nagasuporta usab panginahanglan sa BHB.
Sa milabayng pipila ka tuig, nakahiagum ang pipila ka yunit sa BHB og grabeng kapakyasan atubangan sa nagkakusog nga pasistang atake sa kaaway gamit ang superyor nga pwersang militar aron liyukan ug hadlukon ang mga platung gerilya sa BHB ug rebolusyonaryong masa. Kinahanglang ilhon, sawayon ug tul-iron ang mga kasaypanan, internal nga mga kahuyangan, ug mga kakulian nga nagpaluya sa mga yunit gikan sa epektibong paggamit sa mga taktikang gerilya sa konsentrasyon, pagsabwag ug pagbalhin. Ang pipila niini nga mga yunit nakahiagum sa lain-laing mga problema lakip na ang sobrang konsentrasyon ug pag-uk-uk sa kaugalingon, kahuyangan sa hustong pabalanse sa militar ug pulitikanhong gimbuhaton, nga miresulta sa paghikaw sa ilang katakus nga palig-onon ug palapdon ang baseng masa ug erya sa operasyon. Ang ubang mga yunit naapektuhan sa konserbatismo ug pagkapasibo o mentalidad nga “kuta sa bukid.” Sa pipila ka mga natarang gerilya, nakakosentra ang kaaway og mga pwersa niini sa limitadong erya gamit ang brutal nga mga taktika sa pagpanumpo sa masa aron magtukod ug mga blockhouse, paatrason ang mga yunit sa BHB ngadto sa lisud nga tereyn diin lisud ang daloy sa suplay ug impormasyon, ug pugos silang ibutang sa lunlun-militar nga sitwasyon. Importante kaayo alang sa tanang yunit sa BHB nga matinud-anong aseson ang ilang sitwasyon, ilhon ug patigbabawan ang ilang mga kahuyangan, kakulian ug limitasyon, aron lig-ong moabante ngadto sa mas taas nga ang-ang.
Bisan pa sa pipila ka mga kapakyasan, ang BHB nagpabiling determinado nga iasdang ang rebolusyonaryong armadong pakigbisog sa katawhang Pilipino. Ang determinasyon sa mga Pulang manggugubat sa BHB ug masa nga mosukol nakaugat sa kahusto ug kamatarung sa paglunsad sa armadong pagsukol. Para sa katawhang Pilipino, ang panginahanglan sa armadong pakigbisog labaw pang dili ikalimod tungod sa nagkagrabeng imperyalista ug pyudal nga pagpangdaugdaug, burukrata-kapitalistang korapsyon, nagkagrabeng makihut-ong nga pagpahimulos sa dagkung agalong yutaan ug dagkung burgesya-kumprador batok sa mga mamumuo ug mag-uuma, ug nagkabangis nga pasistang terorismo ubos sa itoy nga rehimeng Duterte. Padayon nga pagasumpuon sa mga nagharing mapahimuslanon ug madaugdaugong hut-ong ang mga pangandoy sa katawhan alang sa tinuod nga nasudnong soberanya ug demokrasya.
Ang mga kapakyasan nga nahiaguman sa pipila ka yunit sa BHB subling nagpamatuod sa panginahanglan nga iasdang ang kaylap ug subsub nga gerilyang pakiggubat subay sa nagkalapad ug nagkalalum nga baseng masa. Gipamatud-an usab kini sa positibong kasinatian sa mas dakung mayorya sa mga yunit sa BHB nga padayong nagkakusog samtang ginakumbina ug ginadirehe ang hustong balanse sa gimbuhatong militar ug gimbuhatong masa (o mga gimbuhaton sa militar ug pulitika), pagpalapad ug konsolidasyon, pagtukod og bertikal nga mga yunit subay sa tukmang balanse sa horisontal nga latag sa mga yunit sa hukbo ug baseng masa, ug uban pa. Nahimo nilang palapdan ang langkub sa mga natarang gerilya o nabawi ang nabuhiang mga erya, o nakatukod og mga bag-ong natarang gerilya samtang nakatukod usab og mga bag-ong platun sa BHB. Gihimo kini samtang gikonsolida ug gipalig-on ang karaang mga erya pinaagi sa dugang nga pagpalapad sa mga organisasyong masa, pagtukod og mga yunit milisya, ug pagkonsolida sa mga organo sa pulitikanhong gahum aron ipadayon ug ipataas ang lebel sa rebolusyong agraryo ug gerilyang pakiggubat aron depensahan ang masa batok sa mga pasistang atake sa kaaway.
Kinahanglang palig-onon sa BHB ang kaugalingon ug mangandam alang sa mas lisud nga pakigbisog samtang atong ipadayon ang malungtarong gubat sa katawhan ngadto sa sunod nga ang-ang. Kinahanglang padayon nga magkutlo ang BHB og mga pagtulun-an gikan sa kasaysayan niini, labaw pang palalumon ang atong pagsabot sa paglunsad sa gubat sa katawhan, ug sumadahon ang atong praktika gamit ang Marxismo-Leninismo-Maoismo ug ang konstitusyon ug programa sa aksyon sa Partido isip teoretikal nga giya.
Kinahanglang magkat-on kita gikan sa mga abanteng kasinatian sa pipila ka kumand sa BHB nga malampusong nakontra ang todong atake sa kaaway. Malampusong nahanas sa pipila ka yunit sa BHB ang mga taktika sa kontra-kubkob pinaagi sa dispersal ug paspas nga paglihok sa mas gagmayng mga yunit aron makalusot sa piot nga koridor sa mga kolum sa kaaway ug aron atakehon ang kiliran ug likuran sa kaaway. Malampusong napugos sa ubang mga natarang gerilya sa BHB ang kaaway nga binaton pag-ayo ang mga pwersa niini pinaagi sa pagpalapad sa mga erya sa operasyon sa BHB aron langkubon ang 6-10 ka lungsod samtang gipabilin ang suod nga liderato sa masa ug nagkadaghang armadong aksyon sa gilapdon sa teritoryo niini.
Hugot nga nagpatuman ang mga yunit sa BHB sa disiplinang militar ug mga palisiya sa seguridad, ug dugang nagpalambo sa mga gerilyang pamaagi sa sekretong pagmaniobra ug pagkampo, aron hikawan ang paggamit sa kaaway sa mga drone, satellite tracker, ug electronic signal, kakumbina ang pwersang paniktik sa kayutaan, alang sa sarbeylans ug pagkaplag sa target; ug sa ingon, hikawan ang kaaway ang higayong gamiton ang ilang aerial asset aron manghulog og mga bomba ug mang-istraping.
Sa mga lugar nga naa sa pokus sa kaaway ug mga baryo nga giokupar sa militar, malampusong nakabarog ang BHB ug ang masa, gibatukan ang mga atake sa kaaway, naglunsad og mga kontra-atake ug gidepensahan ang ilang kaugalingon. Sa inspirasyon sa islogang “Dili magpabuntog sa kahadlok!,” misukol ang masa pinaagi sa armado ug dili armadong pagsukol. Giabog nila ang mga detatsment sa militar sa ilang mga komunidad. Direkta man o dili direkta, ilang gibalibaran ang mga sugo sa kaaway sa pagpangahoy ug pagpanag-ob, o pagpalit og mga suplay, o pagtrabaho sa kampo sa kaaway. Wala nila gitugutan nga sekretong dakpon sa kaaway ang kinsaman o tagsatagsa silang sukitsukiton. Nagpintal sila og mga islogan sa palibot sa ilang baryo aron kundenahon ang presensya ug mga abuso sa kaaway. Gisunog o giguba ang mga detatsment sa militar bisan og temporaryo lang nga mihawa ang mga pasistang tropa para maglunsad og mga operasyon.
Isip pagsuporta sa pagsukol sa masa batok sa pasistang atake sa kaaway, naglunsad ang mga yunit sa BHB sa kaylap ug subsub nga mga aksyong atritibo atubangan sa baga nga deployment sa kaaway pinaagi sa isnayp, paglabay og granada o molotov, ug uban pang mga operasyong haras. Gikumbina kini sa mga batakang taktikal nga opensiba (ambus o reyd) gikan sa likuran o kiliran sa kaaway batok sa huyang ug nakabulag nga mga yunit niini.
Adunay lapad nga panawagan nga banhawon ang mga yunit nga nakabase sa kasyudaran o kabanikanhan nga mahimong moatake sa mga huyang nga bahin sa mga yunit ug elemento sa kaaway nga nakabase sa mga lungsod ug syudad, sama sa mga lokal nga tirano ug uban pang dautang elemento ug mga yunit sa pulis nga sad-an sa gawasnong pag-red-tag, pagdagit, pagtortyur ug pagpatay sa katawhan. Dili lamang sa paglunsad sa mga punitibong aksyon o sabotahe ang katuyuan kundili lakip na usab ang pagtukmod sa kaaway nga madepensiba kutob sa mahimo ug pakunhuran ang pwersang gideploy batok sa mga natarang gerilya.
Kalabot sa pangkahanginang armas sa kaaway, sama sa mga drone, attack helicopter ug uban pang eroplano, ang BHB kinahanglang mokutlo og mga pagtulun-an ug inspirasyon kung giunsa pagpildi sa mga rebolusyonaryong Vietnamese ang armas pangkahanginan sa US pinaagi sa pagpahagba sa kapin sa usa ka libong eroplano sa US niadto pang 1969 gamit ang madaladalang surface-to-air missiles (mga misayl nga ginapabuto gikan sa ubos) nga gunit sa katawhan ug sa ilang mga manggugubat; ug kung giunsa sa Afghan mujahideens milampus sa pagbuntog sa sosyal-imperyalistang Soviet gamit ang mga misayl nga Stinger nga hinatag sa US. Sa milabayng duha ka dekada, napamatud-an sa mga Afghan Taliban nga kaya nilang pildihon ang superyor nga armas pangkahanginan sa imperyalistang US gamit ang mga pusil ug eksplosibo nga mahimong ipunting sa kaaway gikan sa yuta ngadto sa ere, nga mas tukma kaysa sa mga bomba nga ginahulog sa eroplano ug bisan sa mga helikopter pang-atake.
Aron mabuntog ang kaaway gamit ang kasamtangang mga armas sa dagan sa gubat sa katawhan, kinahanglang padayon nga palig-onon ug palapdon sa BHB ang baseng masa niini pinaagi sa paglunsad og agraryong rebolusyon aron ipatuman ang minimum ug maksimum nga programa sa Partido alang sa reporma sa yuta. Asamang lugar nagalunsad og anti-pyudal nga pagsukol ang masa ug ang BHB, lalum ug lapad nga nakaugat ang rebolusyon ug imposible kining maibot. Busa, bisan asa ang BHB, kinahanglang sulbaron niini ang hinanaling mga problema ug panginahanglan sa katawhan pinaagi sa pag-organisa ug pagpalihok kanila aron ipataas ang ilang panawagan sa pagpaubos sa abang sa yuta, pagwagtang sa usura, pagpataas sa suhulan sa mga mamumuong panguma, ug alang sa mas taas nga presyo sa ilang mga produkto; ug batukan ang pagpangilog og yuta sa dagkung kumpanya sa mina, plantasyon, ug ekoturismo, enerhiya ug sa mga walay pulos nga proyektong imprastraktura. Gisuportahan usab sa BHB ang masang mag-uuma sa ilang pakigbisog batok sa palisiya sa liberalisasyon sa importasyon sa bugas ug uban pang produkto sa agrikultura. Kinahanglang usab silang maghatag og tabang sa mga masa sa mga lugar nga naigo sa katalagman pinaagi sa pagtabang kanila sa pag-ayo sa ilang mga umahan ug pagtabang nga iduso ang pagtangtang sa utang ug uban pang hinanaling mga pangayo.
Subay sa palisiya sa Partido sa anti-pyudal nga nagkahiusang prente, nakasandig ang BHB sa mga kabus nga mag-uuma ug mga mamumuong panguma, ginakabig ang hatungang mag-uuma, ug ginanyutralisa sa mga adunahang mag-uuma ug nalamdagang agalong yutaan ug ginapunting sa nag-unang hampak batok sa dagku ug despotikong agalong yutaan. Ginatabangan usab sa BHB ang masang mag-uuma nga mapataas ang ilang kita sa pagpalapad ug pagpataas sa produksyon pinaagi sa mga hunglos ug lain-laing porma sa kooperasyon, ang pagpaambit sa mga siyentipikong pamaagi sa pagpanguma inubanan sa mga tradisyunal nga pamaagi, ug pinaagi sa pag-awhag sa pangdugang sa trabaho (sideline) lakip na ang pagproseso sa ilang mga produkto.
Dugang sa pagtukod ug mga asosasyon sa mga mag-uuma, nagatabang usab ang BHB sa pagtukod og mga organisasyong masa sa kababayen-an, kabatan-onan, bata ug mga mamumuong pangkultura, aron magsilbing pundasyon sa pagtukod sa mga rebolusyonaryong komite sa baryo o organo sa pulitikanhong gahum. Ginapili ang mga upisyal sa rebolusyonaryong komite sa baryo sa mga asembliya sa komunidad asaman posible, ug nagsilbing batakang yunit sa demokratikong gubyerno sa katawhan. Gitahasan kini sa pagpatuman sa mga balaod ug palisiya sa demokratikong gubyerno sa katawhan ug sa programa niini alang sa lokal nga ekonomiya, edukasyon ug kultura, pangpublikong panglawas, ug depensa ug seguridad.
Sa milabayng 53 ka tuig nga paglunsad sa gubat sa katawhan, nakatigum ang BHB sa dili maihap nga mga kalampusan ug kadaugan sa paglunsad sa malungtarong gubat sa katawhan sa usa ka kapupud-ang nasud. Nagaopereyt ang BHB sa mga natarang gerilya nga nakakatag sa tibuok nasud sa 13 ka lain-laing rehiyon ug nakatagamtam og suporta sa minilyong katawhan. Nagtunhay ang binhi sa demokratikong gubyerno sa katawhan sa liboan ka mga baryo. Asaman kini gitukod,nagpatuman ug nagtagamtam sa demokrasya ang katawhan ug aktibong misalmot sa pulitikanhon, ekonomikanhon, katilingbanon, kulturanhong hisgutanan ug seguridad.
Ang gubat sa katawhan sa Pilipinas anaa karon sa tunga-tungang subyugto sa estratehikong depensiba nga adunay tin-aw nga panglantaw sa pag-abante ngadto sa abanteng subyugto ug pagkumpleto niini pinaagi sa pagpadaghan sa mga platun ug kumpanya. Tumong sa BHB nga tumanon ang mga rekisitos sa abanteng subyugto pinaagi sa pagtukod ug mas daghang company-sized nga mga natarang gerilya ug paglunsad og kaylap ug subsub nga gerilyang pakiggubat sa nagkalapad ug nagkalalum nga baseng masa. Sa ingon lamang niini nato makab-ot ang pagpadaghan sa mga kumpanya ug batalyon para sa regular nga malihukong pakiggubat sa estratehikong pagkapatas ug ang pagdeploy sa mga batalyon ug mga rehimento alang sa estratehikong opensiba.
Labaw nga paborable ang mga kondisyon alang sa malungtarong gubat sa katawhan sa Pilipinas atubangan sa nagnana nga krisis sa ekonomiya ug pulitika sa nagharing semikolonyal ug semipyudal nga sistema. Labing nag-antus ang mga mamumuo, mag-uuma, petiburgesyang intelektwal ug uban pang dinaugdaug nga mga hut-ong ug sektor sa dili maagwantang mga kahimtang ug natukmod silang maglunsad sa tanang porma sa pakigbisog, lakip ang armadong pagsukol. Ang grabeng pasistang atake sa reaksyonaryong estado batok sa katungod ug kagawasan sa katawhan labaw pang nagpatin-aw kanila nga wala nay laing dalan ngadto sa nasudnong kalingkawasan ug demokrasya gawas sa paglunsad og rebolusyonaryong armadong pakigbisog.
Ang nagkagrabeng krisis sa nagharing sistema, kakumbina ang nagkagrabeng terorismo sa estado, mitukmod sa nagkadaghang katawhan ngadto sa dalan sa armadong pakigbisog. Kinahanglang pahimuslan sa BHB ang hilabihan ka paborableng sitwasyon aron papaspasanon ang pagpakusog ug pagpalapad niini, ug makatigum og mas dagkung mga kadaugan sa umaabot nga mga tuig.
Mga tahas sa pagpataas sa kapasidad sa pakig-away sa BHB ug sa masa
Daku ang gipakitang kalig-on sa BHB sa pakigbatok sa kaaway. Ubos sa pagpangulo sa Partido, malampusong gipakyas niini ang unum ka tuig nga estratehikong opensiba ug plano sa kaaway nga dugmukon ang armadong rebolusyon.
Labaw sa pagpreserba sa mga pwersa niini, kinahanglang paningkamutan sa BHB nga maisugong moabante ug magpakusog sa umaabot nga mga tuig samtang determinadong nakig-away sa kaaway. Kinahanglang padayon niining lantawon ang pagtuman sa tahas sa pagkumpleto sa mga rekisitos sa abanteng subyugto sa estratehikong depensiba. Kinahanglan natong iasdang ang gubat sa katawhan pinaagi sa makugihong pagkumbina sa tulo ka sangkap niini nga mao ang armadong pakigbisog, agraryong rebolusyon ug pagtukod sa baseng masa.
Kinahanglang paspas nga mopahiangay ang BHB sa mga taktika ug estratehiya sa kaaway ug patigbabawan ang tanang babag aron iabante ang gubat sa katawhan. Kinahanglang mamugnaon natong palambuon ang atong mga taktika sa gerilyang pakiggubat aron ilunsad ang kaylap ug subsub nga gerilyang pakiggubat subay sa nagkalapad ug nagkalalum nga baseng masa. Sama sa naandan, ang yawe mao ang pagpukaw sa halapad nga masa sa katawhang Pilipino aron dinaghan silang moalsa batok sa pasistang tiraniya.
Sa umalabot nga usa o duha ka tuig, kinahanglan natong ipatuman ang pipila ka mga partikular nga tahas aron mapataas ang katakus sa pakig-away sa BHB ug sa masa aron padayong iasdang ang rebolusyon.
1) Palig-onon ang pagpangulo sa Partido sa BHB.
Ang BHB nakapailalum sa absolutong pagpangulo sa Partido. Kinahanglan natong siguruhon nga adunay nagbarog nga mga sanga ug komite sa Partido sa tanang lebel sa BHB aron magiyahan ang tanang aksyon sa mga Pulang manggugubat ug kumander. Ginasiguro niini nga pulitika ang nagamando sa tanang panahon. Kinahanglang pangulohan sa mga komite sa partido ang BHB sa pagplano, pag-ases ug pagsaway sa kaugalingon. Kinahanglang walay kakapuy nga ipataas sa Partido ang pulitikanhon ug pang-ideolohiyang kahimatngon sa mga Pulang kumander ug manggugubat sa BHB pinaagi sa walay puas nga pagpahigayon og propaganda ug edukasyon sa ilang han-ay.
Kinahanglang makugihong magpalambo ang mga komite sa Partido ug magrekrut og mga kandidatong myembro gikan mga Pulang manggugubat nga abante sa pulitika ug siguruhon nga moagi sila sa mga kurso sa Partido aron molalom ang ilang pagsabot sa Marxismo-Leninismo-Maoismo ug ang pagdapat niini sa praktika sa gubat sa katawhan. Kinahanglang magsilbing modelo sa disiplina ug determinasyon ang mga myembro sa Partido sa BHB ngadto sa mga Pulang manggugubat ug masa. Dili mabuntog ang demokratikong rebolusyon sa katawhan hangtud padayon nga ginapataas sa Partido ang rebolusyonaryong edukasyon, pagbansay ug pagdeploy sa mga kadre ug myembro sa Partido, kumander ug manggugubat sa BHB ug auxiliary forces (pwersang pangdugang), mga aktibista sa rebolusyonaryong organisasyong masa ug mga upisyal ug personel sa demokratikong gubyerno sa katawhan.
2) Kusganong ilunsad ang armadong pakigbisog ug batukan ang bangis nga gubat pagpanumpo sa kaaway.
Kinahanglang walay kakapoy nga depensahan sa BHB ang masa batok sa mga pasistang atake sa AFP ug PNP ug pinaagi sa paglunsad sa kaylap nga mga taktikal nga opensiba. Kinahanglang silutan niini ang mga pasista sa ilang mga krimen batok sa katawhan.
Kinahanglang maglunsad ang BHB og subsub ug kaylap nga atritibong aksyon sulod sa mga lugar kung asa baga ang deployment sa kaaway, ug maglunsad og solidong batakang taktikal nga mga opensiba sa kiliran ug likuran sa kaaway aron puuhon ang mga yunit sa kaaway ug kumpiskahon ang mga armas niini.
Kinahanglang aktibong palihukon sa BHB ang mga yunit milisya niini aron maniktik ug makakrukis og kompletong mapa sa mga posisyon sa kaaway ug magmugna og plano aron gub-on ug bungkagon ang mga plano sa kaaway pinaagi sa balik-balik nga pag-igo sa mga posisyon niini. Kinahanglang bungkagon ang kutay paniknik sa kaaway. Mamahimong maglunsad ang BHB og nagtinubagay nga mga inter-front o inter-subrehiyong taktikal nga opensiba. Kinahanglang padug-on ang kaaway sa liboan ka mga samad ug panapanahon kining bunalan sa ulo.
Kinahanglang ipataas sa BHB ang katakus niini nga maglunsad og mga espesyal nga taktikal nga opensiba sa mga nag-unang linya sa transportasyon ug komunikasyon sa kaaway. Pwede niining paralisahon ang sistema sa komunikasyon sa kaaway, targeton ang air asset niini ug silutan ang mga pasistang kriminal nga amo. Kinahanglang epektibo niniing isabotahe ang kapasidad sa kaaway kutob sa mahimo ug ipatuman ang mga punitibong lakang batok sa mga huyang nga yunit ug elemento sa kaaway aron mahatagan og hustisya ang ilang mga biktima ug itukmod ang ang kaaway sa depensiba ug makunhuran ang kibhangan sa mga pwersa sa kaaway nga nakalatag batok sa mga natarang gerilya.
Kinahanglang matinud-anon nga likayan sa BHB ang mga depensiba, kapakyasan o kapildihan. Kinahanglang hugot nga bantayan niini ang lihok sa kaaway ug padayon nga magpakahanas sa sekreto o tago nga mga pamaagi sa mga gerilyang maniobra. Kinahanglang isalikway sa BHB ang kaluag sa seguridad, sama sa pagpili sa taas ug lisod nga ruta kaysa moagi sa posibleng ambush site sa kaaway. Kinahaanglang istriktong ipatuman sa tanang yunit sa BHB ang mga palisiya ug pagtulun-an aron batukan ang kampanya sa kaaway sa pagpamomba ug pagpang-istraping gikan sa ere ug pagpanganyon; ug hikawan ang kaaway sa eksaktong target. Wad-an og kapuslanan ang mga drone sa kaaway ug uban pang mga pamaagi sa electronic ug ground surveillance pinaagi sa paglikay sa tanang panahon ug kutob sa mahimo, nga makahatagsa kaaway sa bisan unsang timailhan sa atong nahimutangan (aso, kahayag ug elektronik nga mga signal).
Kinahanglang kusganon natong ibutyag ug suklan ang bangis nga gubat sa kaaway sa kabanikanhan. Kinahanglang siguruhon nato nga mataho ang matag kaso sa pag-abuso sa militar ug pulis sa mga katungod sa masa, matag kaso sapagpanganyon ug pagpamomba gikan sa ere mihadlok sa mga sibilyang komunidad, midaut sa ilang panginabuhian ug miguba sa kinaiyahan. Kinahanglan natong buhaton ang tanang paningkamot aron ibutyag ang mga paglapas sa internasyunal nga makitawhanong balaod ug dad-on ang tanang kaso sa pag-abuso ngadto sa internasyunal ug lokal nga komunidad sa tawhanong katungod ug mga tigpasiugda sa kalinaw.
3) Pakusgon ang Bagong Hukbong Bayan.
Kinahanglang pakusgon ang BHB sa militar ug pulitika. Kinahanglang adunay klarong plano aron magrekrut og liboan ka Pulang manggugubat gikan sa masang mag-uuma, ilabina ang kabatan-onan. Kinahanglan usab nga adunay klarong plano sa pagrekrut og bag-ong mga Pulang manggugubat gikan sa mga mamumuo ug petiburgesyang intelektwal. Ang mga lokal nga sanga sa Partido ug mas taas nga komite, sa kabanikanhan ug kasyudaran, kinahanglang adunay konkretong target ug pamaagi sa pagdeploy sa mga myembro niini ug baseng masa ngadto sa BHB.
Kinahanglang siguruhon sa BHB ang pagpahigayon sa pulitiko-militar nga pagbansay sa mga kumander ug manggugubat niini aron bansayon sila sa pagpangulo sa mga yunit sa BHB sa gimbuhatong masa ug militar. Kinahanglang huptan sa matag manggugubat sa BHB kang Tulo ka Nag-unang Lagda sa Disiplina ug Walo ka Punto nga Angayang Tamdan, ingonman ang mga espesipikong palisiya ug punto sa disiplina aron mamentina ang seguridad sa mga yunit sa BHB samtang nagkampo, naglakawan, anaa sa gimbuhatong masa o naglunsad og taktikal nga mga opensiba.
Kinahanglang balansyadong tukuron sa BHB ang bertikal ug horisontal nga mga yunit niini. Kinahanglang matukod ug ikumbina ang tulo ka matang sa pormasyon sa BHB sa matag natarang gerilya, subrehiyon ug rehiyon: ang mga platun sa BHB alang sa gimbuhatong masa (sandahang yunit propaganda); ang mga platun hangtud sa gagmayng kumpanya sa mga yunit gerilya sa ang-ang subrehiyon ug rehiyon nga nagsilbing sentro-de-grabidad sa gerilyang pakiggubat sa ilang erya, ug nga may batakang elemento sa malihukong gerilyang pakiggubat; ug ang mga lokal nga gerilyang yunit milisya ug mga yunit sa milisya sa pagdepensa-sa- kaugalingon sa mga organisasyong masa.
Kinahanglang tukuron sa BHB ang armadong kusog niini ug magdebelop ug tukma nga armas aron makigbatok sa kaaway. Panguna nga nagsalig ang BHB sa pag-ilog sa mga riple ug uban pang armas gikan sa kaaway. Sa samang higayon, gikombinar niini ang paggamit sa high-powered nga mga hinagiban uban sa lumad o ubos nga kusog nga mga hinagiban, lakip na ang hinimo sa balay nga mga pusil, ingon man usab sa pagpalambo sa command-detonated ug hand-held explosives o granada gikan sa anaa nga mga materyales. Kini nga mga armas kinahanglang himoon sa dinaghan nga gidaghanon ug kaylap nga ipakatap sa mga Pulang manggugubat ug mga yunit sa milisya. Kinahanglang magbansay ang BHB sa paggamit sa mga riple niini o paghimo og mga hinagiban batok sa mga ayroplano sa kaaway.
Kinahanglan natong ipataas ang lebel sa kulturanhong aktibidad sulod sa BHB ug ang kulturanhong gimbuhaton sa BHB han-ay sa masa. Kinahanglang tudloan ug dasigon ang mga Pulang manggugubat ug kumander sa BHB nga ipadayag ang ilang mga kasinatian, ang pagpahimulos ug mga pangandoy sa masa, kasilag sa kaaway ug mga rebolusyonaryong ideya sa lain-laing mamugnaong porma nga makatabang sa pagpataas ug pagpalig-on sa rebolusyonaryong kabubut-on sa ilang isigkamanggugubat ug masa. Kinahanglang kusganon natong isalikway ang mga kulturanhong impluwensya sa nagharing sistema nga naghilo sa hunahuna sa kabatan-onan.
4) Palapdon ug palalumon ang baseng masa sa BHB sa mga natarang gerilya.
Ang masa ang tinubdan sa kusog sa BHB. Kinahanglan natong palig-onon ang bugkos nga naghugpong sa BHB ug sa masa. Kinahanglan natong mapalihok ang masa sa ilang gidaghanon.
Ang BHB, uban sa masang mag-uuma, kinahanglang maglunsad og kaylap nga agraryong rebolusyonaryong pakigbisog sa tanang panahon. Kinahanglang ikumbina ang mga pangmasang pakigbisog batok sa tanang porma sa pyudal nga pagpangdaugdaug sa ilang mga pakigbisog batok sa pasismo ug pagpang-abuso sa militar.
Kinahanglang magkugi ang BHB ug tanang rebolusyonaryong pwersa aron ipatuman ang kaylap nga propaganda, ahitasyon ug pagpalihok sa masa. Kinahanglang ipatuman niini ang tanang porma sa propaganda aron epektibong maabot ang katawhan sa ilang tagsatagsang erya sa operasyon.
Kinahanglang siguruhon niini ang pag-apud-apud sa Ang Bayan, uban pang rebolusyonaryong publikasyon, ug mga pamahayag sa PKP, BHB ug NDFP sa nasudnon ug rehiyonal nga ang-ang aron itin-aw ang mga panglantaw sa rebolusyonaryong kalihukan sa mga talagsaong isyu nga giatubang sa nasud ug katawhan sa mga rehiyon.
Kinahanglang magprodyus ug mag-apud-apud ang mga lokal nga yunit sa BHB og mga polyeto ug lokal nga mga mantalaan para ihikyad ang kasamtangang pagtuki sa mga lokal nga isyu ug problema sa katawhan aron mapataas ang ilang kahimatngon, militansya ug determinasyon nga ipakigbisog ang ilang interes. Busa, kinahanglang kanunay silang magpahigayon og katilingbanong imbestigasyon sa mga hinanaling problema sa masa sa ilang mga baryo ug lungsod. Pwede silang maghimo og mga lokal nga programa sa radyo o bidyu. Pwede silang makiglambigit sa mga kabatan-onan ug masa sa ilang mga lugar pinaagi sa social media o tago ug luwas nga paagi sa elektronikong komunikasyon. Kinahanglan silang maningkamot nga makiglambigit sa masmidya aron malukpanong abton ang katawhan.
Kinahanglang maglunsad og propaganda ang mga lokal nga yunit milisya ug mga organisasyong masa sa ilang mga baryo ug mga sentrong lungsod. Gawas sa uban pa, mahimo silang maglunsad og mga operasyong pagpintal o dikit aron ipadayag ang ilang mga reklamo batok sa mga pag-abuso sa militar sa ilang mga lugar o aron ipadayag ang ilang mga pangayo sa ekonomiya. Ang mga lokal nga tsapter sa batakang organisasyong masa mahimong magpagula og mga pamahayag ug ipang-apud-apud kini sa mga residente.
Kinahanglang lig-on ug desididong ibutyag sa BHB ug batukan ang mga bakak ug dis-impormasyon nga gipakaylap sa kaaway. Angayang dili nato tugutan nga makalusot ang ni isa ka bakak sa kaaway. Kinahanglan natong gamiton ang tanang paagi sa pagtigum sa tanang kamatuoran ug pruweba aron ibutyag ang kamatuoran.
Kinahanglang magpahigayon ang mga yunit sa BHB og mga kampanya alang sa panglawas sa publiko, lakip ang padayon nga edukasyon kalabot sa pandemyang Covid-19, ingonman sa uban pang mga sakit nga endemic (kaylap o daan nang nagtunhay) sa lokal nga lugar. Kinahanglang magmuntar sila og mga pangmasang klinika ug uban pang porma sa paghatag og serbisyong panglawas sa masa.
Kinahanglang kusganon natong palambuon ang rebolusyonaryong kalihukang pangkultura sa han-ay sa masa pinaagi sa pagpasiugda ug pagpakaylap sa mga rebolusyonaryong awit, balak ug uban pang mga obra. Kinahanglang mag-organisa kita og mga lokal nga chorals (grupo sa mga mang-aawit) o dance troupes (grupo sa mga mananayaw) sa han-ay sa mga kabatan-onan ug bata, ug maglunsad og inter-baryo o inter-lungsod nga mga pyesta aron ipasiugda ang lokal nga rebolusyonaryong kultura.
Kinahanglang tudloan usab sa BHB ang masa sa mga taktika aron gamiton ang reaksyunaryong balaod batok sa mga madaugdaugon kanila. Magamit nila ang lain-laing porma sa organisasyon ug mobilisasyon aron makuha ang labing dako nga partisipasyon sa usa ka komunidad, ug pahimuslan ang pagkabahinbahin sa kaaway.
5) Ihimugso ang kaylap nga suporta gikan sa kasyudaran alang sa rebolusyonaryong armadong pakigbisog sa kabanikanhan.
Kinahanglang pukawon, organisahon ug palihukon sa Partido ug BHB ang lapad nga masa sa kasyudaran aron suportahan ug mosalmot sa rebolusyonaryong armadong pakigbisog sa kabanikanhan.
Kinahanglan nga adunay dugang nga paningkamot aron ipatuman ang propaganda ug edukasyon sa mga masa sa kasyudaran nga adlaw-adlawng na-umol sa mga bakak sa kaaway pinaagi sa masmidya ug social media. Kinahanglan natong ipakita nga ang mga problema sa mga mag-uuma sa kabanikanhan hugot nga naasumpay sa mga problema sa mamumuo ug sa walay trabaho, mga estudyante, mga kabus sa kasyudaran, mga propesyunal, mga ordinaryong empleyado ug uban pang dinaugdaug nga mga sektor.
Kinahanglang dasigon nato ang masa sa kasyudaran nga maglunsad og militanteng kolektibong pakigbisog aron depensahan ang ilang mga katungod ug kaayuhan, batukan ang pulitikanhong pagpanumpo ilalum sa pasistang rehimen, ug suklan ang imperyalistang dominasyon ug interbensyong militar. Kinahanglang magpagawas kita og tukma-sa-panahong mga islogan ug panawagan aron awhagon ang masa nga maglunsad og mga aksyong protesta sa ilang mga pabrika ug trabahoanan, sa mga eskwelahan ug mga komunidad, ug moadto sa kadalanan ug maglunsad og dinagkung demonstrasyon aron sawayon ang madaugdaugon nga mga palisiya sa ekonomiya, pagpakaitoy sa nagharing rehimen. Todong liberalisasyon, pabug-at nga mga buhis, ubos nga suhulan ug ubos nga sweldo, pagsaka sa presyo sa pagkaon ug gasolina, pagsaka sa matrikula, ug pagmahal sa ubang serbisyo.
Kinahanglang lig-on natong tukuron ang mga sanga ug komite sa Partido, ug ang tago nga mga rebolusyonaryong sektoral nga organisasyon nga kaalyado sa NDFP sa kasyudaran. Kinahanglang himuon niining mga organisasyon ang ilang papel sa propaganda ug edukasyon aron mapataas ang rebolusyonaryong kahimatngon sa katawhan sa kasyudaran. Kinahanglan nilang ibutyag ug suklan ang “teroristang designasyon” batok sa PKP nga gigamit sa mga imperyalistang US isip pasangil sa interbensyong militar. Gitahasan silang dasigon ang masa sa kasyudaran nga mosalmot sa BHB sa kabanikanhan, ug motabang sa pagtigum sa pulitikanhon ug materyal nga suporta alang sa rebolusyonaryong armadong pakigbisog.
Mamahimo nilang siguruhon ang seguridad sa mga aktibista ug lider masa nga target sa pasistang paglutos o mga hulga nga arestuhon o patyon, ug pag-atiman sa ilang pagbalhin ngadto sa kabanikanhan aron magpadangop sa NPA.
6) Kinahanglang sistematiko kitang magpropaganda sa han-ay sa kaaway.
Kinahanglang epektibo natong ilunsad ang mga propaganda nga partikular nga nakapunting ngadto sa han-ay mga sundalo sa kaaway nga kasagarang gigamit nga pangbala sa kanyon sa brutal nga kontra-insurhensiyang mga operasyon sa kaaway. Kinahanglan natong awhagon ang mga gikan sa han-ay sa mga dinaugdaug ug pinahimuslang mga hut-ong nga mobiya sa militar ug kapulisan ug moduyog sa ilang mga kahut-ong sa pakigbisog alang sa ilang makatarunganong kawsa. Kinahanglang manawagan kita kanila nga ibutyag ang ilang kahibalo sa mga krimen, korapsyon ug maluho nga kinabuhi sa mga upisyal sa AFP.
Kinahanglang manawagan kita sa mga kabatan-onan nga talikdan ang reaksyunaryong armadong pwersa ug pulis, unsamang isaad niining taas nga sweldo, pinaagi sa pagbutyag sa AFP ug PNP isip mga kaaway sa katawhan ug pagyagyag sa mga krimen nga gihimo sa pwersa sa militar ug pulis batok sa katawhan. Apan ang uban kanato mamahimong tugutan nga buhaton ang tanan aron sekretong makumbinse ang mga paryente nga anaa sa mga akademya militar o mga upisyal na sa reaksyunaryong armadong pwersa nga may igong pag-amping ug pagkamabinantayon.
Adunay talagsaong kasinatian ang PKP ug BHB, ingonman ang uban pang mga rebolusyonaryong organisasyong masa, sa pagkabig sa mga upisyal, kadete ug mga ginsakpan sa kaaway ngadto sa rebolusyon. Katimbayayong sa pagbungkag sa mga pwersa sa kaaway sa natad sa panggubatan ang pagpukan niini pinaagi sa maawhagon nga pamaagi gawas sa natad sa gubat, pagdawat sa mga pagsurender sa kaaway ug maayong pagtratar sa mga misurender.
7) Agresibong magpatumaw og internasyunal nga suporta alang sa Bagong Hukbong Bayan ug sa rebolusyong Pilipino.
Kinahanglang pasubsubon nato ang atong mga paningkamot sa pagpahibalo sa mga migranteng Pilipino ug katawhan sa tibuok kalibutan mahitungod sa kamatarong sa rebolusyonaryong armadong pakigbisog sa nasud isip pakigbisog alang sa kalingkawasan gikan sa imperyalistang dominasyon ug alang sa tinuod nga demokrasya.d Kinahanglan natong ibutyag ang papel sa imperyalismong US sa gubat pagpanumpo ug ihingusog ang pagtapos sa suportang militar sa US alang sa neokolonyal nga pasistang estado.
Kinahanglang makabig nato ang internasyunal nga suporta ubos sa prinsipyo sa proletaryong internasyunalismo, pinaagi sa pagtukod sa anti-imperyalistang panaghiusa, pinaagi sa pakigtambayayong sa mga rebolusyonaryong organisasyong Pilipino sa ilang mga kaalyadong organisasyon gawas sa nasud ug pinaagi sa proto-diplomatiko ug diplomatikong relasyon sa mga gubyernong anti-imperyalista ug nanalipud sa ilang nasudnong kagawasan ug sosyalistang mga programa o pangandoy.
Gitahasan sa Komite Sentral sa Partido Komunista ng Pilipinas ang tanang pwersa niini nga maisugon ug kusganong ipatuman ang mga tahas nga nakahan-ay sa ibabaw aron maisugong ipadayon ang gubat sa katawhan ug pakyason ang desperadong paningkamot sa kaaway nga pugngan ang pagkusog sa BHB, sa masa ug sa mga rebolusyonaryong pwersa.
Atubangan sa paborableng katilingbanong kundisyon, kinahanglang ipwesto sa Partido ang kaugalingon sa unahan sa minilyong katawhang Pilipino sa malukpanong pag-alsa batok sa nagkagrabeng porma sa pagpangdaugdaug ug imperyalistang dominasyon. Kinahanglang pangulohan niini ang BHB ug ang masa sa pagpakusog sa rebolusyonaryong armadong pakigbisog, kab-oton bag-ong mga kadaugan ug mas dakung pag-abante sa umaabot nga mga tuig.
Manglimbasog ug iasdang ang gubat sa katawhan!
Mabuhi ang demokratikong rebolusyon sa katawhan!
Mabuhi ang Bagong Hukbong Bayan!
Mabuhi ang Partido Komunista ng Pilipinas!
Mabuhi ang proletaryado ug katawhang Pilipino!